Katkam ka FIR wa da booh ha Laban Police Station da ki khynroo Khasi, da pyntip wa da chah dat ki da ki wait ha ki 7 ngut ki bru kiwa man ki dkhar Muslim.
Ini da jia i hei miet ka 16 tarik heipor kamwa 10:45, heiwa da em 7 ngut ki bru kiwa man kam ki dkhar Muslim kiwa lai luti da kawi ka kari Alto 800 kawa em Number ML-05Y-4372 wei kini ki khynroo Khasi won toh kiwa lai luti cha Red Cross, Laban lyngba ka Harisabha wei kani ka kari wa em ki Muslim da wan ko na Wrong Side wei da khang laad ko leh wow lai ki.
Hawa yaklam ki wa kini ki 7 ngut yow lai ki chadien yow lait u lai, da sdang pathan ki wow dat ya ki Khasi wa em hapoh kari wei manda mih ki napoh kari yow pyn jai-jai, da em na ki kattu katni na kini ki 7 ngut kiwa da yut cha thaw sah ki ha Harisabha wei da wan ki deiwa rah wait wa kiwi ki tiar wa nep heiwa uwi na ki Khasi da chah dat u da u klong na khlieh.
Sa uwi won da chah dat u da ka wait wei da mynsoo u malu mala katwa uwi won da toh u da ka wait nei dur khmat.
Da ong wa kini ki bru da pyrchang ki wow pynyap ki da kini ki tiar wa nep tangwa da ye ki wow yada wei wow yut na ini i thaw.
Ha ka FIR da ong leh wa kini ki 7 ngut toh kiwa kreh mylla kiwa da wan na Assam wei da sah yung wai ki khlem da pyntip wei yoh bor na ka dorbar chnong.
Neiliang ki pulit da kem noh ki ya kini ki 7 ngut wa emkti wow dat pynmynsoo ya kini ki khynroo Khasi.
Discussion about this post