Hadien wa pdung u Bomb ynnin i janmiet heipor kamwa 6:30, ki pulit da pynman ki yei takit wa wut-wut wei hadien kattu katni por da rah noh ya uwi u khynnah hajrong i suba wa emkti u ha ini i kaam deiwa lai kem ya oo na yung wa sah u pyn ynnin i miet ha Shillong.
Katkam ka yutip wa da yoh, da ong wa uni u khynnah toh uwa dang 17 snem wei hadien wa kynreh ya i yung wa sah u da chem ya ki tiar chna Bomb IED wa kynthup ya ki naar-rod lyngkhot, ki Wire wa ki Battery.
Neiliang ki pulit da rah noh ki ya uni u khynnah wow takit ya oo.
Ynnin i miet hadien ini i jia, neiliang u Montri wa pait ya ka chnat kaam pohyung, u Lahkmen Rymbui da pyntip u wa ya ki bru wa suba wa emkti ha ini i kaam da tip ya ki, wei ki pulit daw kem lut ki ya waroh kiwa emkti ha ini i kaam.
Kam wow kdaw heini, i pdung wa i chem Bomb Improvised Explosive Device (IED) da jia i hadooh 3 sien du ha ki kajiak bnai wa dadep, itæ ha i miet ka 12 tarik Naiynñiaw 2021 ha Police Reserve ka Khliehriat, East Jaiñtia Hills District, ha ka 10 tarik Naisaphra 2021 ha Laitumkhrah heiwa da mynsoo ar ngut, wei ha ka 4 tarik Naichiphaw 2021, ki pulit da yoh ki ya uwi u Bomb IED ha thaw psiah ka yung krehkaam ka NPP, ha Shillong.
