Ki chipai ka Assam Rifles ha Nagaland deilang wa ki pulit da kem ki ya ki 6 ngut ki bru naka thaaiñ Kitsakita (Zunheboto) haka 25 tarik uni u bnai kiwa khayi tooh ya i kiad pharæng iwa chongdor T. 8.7 lak.
Ha Manipur won, ki chipai ka Assam Rifles da yoh ki wow em yei drug Heroin wa chongdor T. 1.2 klur na Bishnupur District haka 25 tarik wa 87.5Kg i Brown Sugar deilang wa 26.5 litre i Brown Sugar wa dang man um wa chongdor T. 200 klur na Thoubal District haka 26 tarik.
Haka 25 tarik da yoh leh wow kem ya ki dieñ wa chongdor T. 65 lak wa 140 churia ki mar wa khayi tooh kiwa chongdor T. 2.36 klur na Tengnoupal District wa 40 churia u kwai wa chongdor T. 9.6 lak na Kamjong District.
Na khappood waka Myanmar da yoh wow kem yaki kari wa kit dieñ pyrchah yaka aiñ wa chongdor T. 1.44 klur ha Chandel haka 25 tarik, 49 churia u kwai wa chongdor T. 11.7 lak da yoh kem na Shangshak, Manipur haka 24 tarik. Na Khongjol, Chandel da yoh leh wow kem yaki mar wa khayi tooh kiwa chongdor T. 53.58 lak.
Ha Mizoram won, ki chipai ka Assam Rifles deilang waka Excise & Narcotics Department haka 25 wa 26 tarik da yoh ki wow kem ya arngut kiwa dai drugs ha Aizawl wei waroh i drugs wa yoh kem toh iwa khia 801 grams iwa chongdor kamwa T. 3.6 klur.
Ki chipai ka Assam Rifles da yoh ki leh wow kem 100 churia u kwai wa chongdor T. 16.8 lak na thaaiñ Kelkang-Khuangleng wa 128 gram i Heroin wa chongdor T. 57.60 lak na Aizawl haka 23 tarik.
Da yoh leh wow kem yaki sikret wa khayi tooh wa chongdor T. 7.80 lakh na thaaiñ Zokhawathar haka 24 tarik.
Ha Arunachal Pradesh won, ki chipai ka Assam Rifle deiwa ya krehlang wa ki pulit da yoh ki wow kem ya 304 gram i Brown Sugar wa chongdor T. 60 lak najan i chnong Bonia, Longding District haka 24 tarik uni u bnai heiwa ya uwa rah kamjooh ya kini ki mar da ekti cha ki pulit.
