Hadien waka sorkar pyrdi da pynbna ko yaka Lockdown wa 21 sngi neibynta wow yada ya kiwa chong chnong ka ri India, na i maa yong u COVID-19, neiliang ki Dorbar Chnong waphær waphær yong ka Elaka Sumer, East Jaiñtia Hills District da pynbna chnong ki yow kyntu ya kiwa dai dukan wow khang khyrdep yaki dukan kamwa da phah daka sorkar, tangwa da sñiawphylla wa ki dukan wa em kamwa 30 tylli hapoh ka chnong Mynthning ym burom ki ya katai ka hukum yong ka sorkar wei wai ki yaki dukan yong ki.
Hadien wa yoh yutip hajrong ini, neiliang yong ka EJNC-Sumer Circle, hapoh i yahkhmat yong u Sakilan Chyrmang, President ka Circle, ka seiñ da hiar ko cha katai ka chnong wow pynsñiawthooh leh ya kitai ki tre dukan ya i maa yong u COVID-19, wei da kyrpad leh yaki wow khang khyrdep yaki dukan yong ki neibynta wow yada na i poor yong utai u khñiang uwa da pynchong syier yaka pyrthai waroh kawi. Hadien i pyn sñiawthooh wa i kyrpaad yong kiwa yahkhmat ka EJNC-SC neiliang ki tre dukan da khang noh ki yaki dukan ki.
Ha iwi i liang, ka EJNC-SC, da kyntu ko ya kiwa chong chnong yong ka Elaka Sumer wa yaka jylla hi waroh kawi wow ya krehlang wa ka sorkar ha kini ki por wei wow man kiwa yaichah neibynta wow yada na u COVID-19.
Ha i jooh i por, ka seiñ khang pyrchah ko ya i wan yong ki bru kiwa na baar chapoh ka Elaka Sumer neibynta wow yada yaki paidbah na u COVID-19.
Discussion about this post