U MDC ka Mynsngat Khanduli, u Dawan Lyngdoh da kyntu u ya kiwa yahkhmat chnong nadooh ki waheh chnong waki VDP yong ka jylla wym toh u chim ya ka aiñ ha kti ha kam kani ka por wa kiwa boon ki paidbah maad ki yei eh kiwa boon jait.
Kamtæ hawa chem ya ki paidbah wa lai luti lyngba ki chnong yong i ym toh wow pynchitom kulmar ya ki wei toh u bood katkam ki aiñ, wei toh leh wow tip ya ki daw kiwa biang wa lai luti neibhah wot lada pynkhor yei khang chnong na i daw wa poor smat u COVID-19, em ki bynta kiwa ym yohsa wow mih cha lait lane wow lai luti na kawi ka chnong cha kawi, wei ha i jooh i por kamwa man kattæ ki khynroo khyllood wa lai puræ wa kiwa mylla sngi dang boon kiwa sahkut cha Shillong, Jowai wa Nongstoin, neibhah wa ym poi pyrkhat wa kani ka Curfew u jia ko kamni, kamtæ boon na ki ym em liwan ki ha ka Curfew kawa nongkong wei hadien i pynbna won u PM Narendra Modi ya ka Lockdown, kiwa boon ki paidbah wa kiwa lai puræ da sahkut ki cha ki thaw kiwa em ki wei katni boon na ki leh hadien wa ym yoh poisa de wow thied ya ki marbaam mardih kamjooh wym em kari da hap ki wow mih yow liwan yung da i kjat cha ki chnong ki.
Kamtæ hajrong ini i bynta kam kiwa yahkhmat chnong toh wow man kiwa sñiawthooh lang ya i eh kiwa dooh ki rangli kiwa hap wow kreh mylla na kawi ka chnong cha kawi won wei khamtam ya kitu kiwa dang sahkut ha chiteiñ luti toh wow yarap lang ya ki ym toh wow kyntait ya ki.
U MDC da kyrpaad u leh wa toh u yarap kylliang ha kam kani ka por wa ka pyrthai waroh kawi em ko hei yaleh wow pyndooh jait ya uni u khñiang COVID-19, kamtæ khnang wow lait na i yap thngan i toh wow yarap mar kylliang ha kiwon kiwon ki bynta wa ye i.
Discussion about this post