Hadien wa yap arngut wei da tikna wa 80 ngut kiwa yoh ya u khñiang COVID-19 ha ri Italy, ka sorkar da chim ko yaka rai wow khang kset ya chi dorjon ki chnong deiwa phah leh ya waroh kiwa chong chnong wow chong ki hapoh yung.
Ka bru wa 75 snem da khlaad ko na uni u khñiang ha i chnong Codogno, Lombardy ynnin ka 22 tarik wei ini da wan i chi sngi hadien wa yap uwi u bru wa 78 snem uwa man uwa nyngkong uwa yap na uni u khñiang ha thaaiñ Veneto.
U Prime Minister, Giuseppe Conte da pyntip u wa hadien wa khut u yaka yalang wa jhan, heiwa da phah ya palat 50,000 ngut ki bru wa im ha chi dorjon tylli ki chnong ha ki thaaiñ chaneiñ ka ri wow chong bait ki hapoh yung.
U nyngkong dooh wa yoh ya uni u khniang toh uwi u bru wa 38 snem uwa yachem wa uwi u bru wa dang wan na china haka 21 Jan, da pyntikna ka chnat i chait i khiah ka ri.
Uni u bru dang chah sumaar u wei man u uwa chitom bha, ka kurim u wa uwi u lok ki leh da yoh ki ya u COVID-19.
Da boodien leh ya u Doctor wa wan pait ya uni u bru ha yung u wei kamjooh ya ki 120 ngut ki bru wa kreh lang wa oo haka Company Unilever kawa em ha Casalpusterlengo, Gallera.
Le ngut won ki bru wa da thiah kjut chwa ha ka Hospital wa em ha Codogno, i thaw wa lai phah sumaar u, da yoh ki leh ya uni u khñiang deilang wa 5 ngut ki Nurse wa ki Doctor.
Ka sorkar da phah khang ko leh ya waroh ki skur, ki dukan wa ki restaurant ha Veneto wa Lombardy kamjooh yow pyndam leh wow pynman yaseiñ hadooh wa pynmih hukum da kawi.
U Prime Minister da pynbna u ynnin leh wa waroh ki yakob yalehke da phah pyndam ki wa kynthup ya ki le tylli ki yalehbol ka Serie A kiwa toh u pynman ynne ka sngi Bibar wei kawi na kini ki yalehke toh hapyrdi ka Inter Milan waka Sampdoria.
Ka sorkar dang pyrkhat ko leh wow kyrriah tarik leh ya waroh ki tamasa kam ka Carnival of Venice kawa da sdang katni.
Discussion about this post