Ka Supreme deiwa pyrkhat yei chngaaiñ kiwa lai wa wan kam kawi na ki hok hapoh ka Article 21 ka Constitution ka ri, da pynmih ko boon ki hukum heiyatoh wa ki sarok National Highway wa ki Expressway wa em hapoh ka ri.
Da phah wow khang wei kyrriah ya waroh ki thaw baam nadooh ki Dhaba wa kiwi de kiwa da kyntoor cha uwon uwon u sarok National Highway deiwa bhah leh wow booh ki Ambulance wa em ya ki Basic Life Support wa ki Truck Lay-Bye ha kiwa boon ki bynta ki Highway.
Ya ka hukum da pynmih da ka miej bichaar u Justice JK Maheshwari wa u Justice Atul Chandurkar hadien wa da chim ka Supreme Court da ka wow leh da ka Suo Moto Case hadien iwa jia ha Rajasthan wa ha Telangana ha u November 2025 heiwa ha Rajasthan kawi ka kari Tempo Traveller da lai tyrrah ko ya ka Truck wa pynyieñ ha rood sarok katwa ha Telangana won kawi ka Bus da lai tyrrah ko ya kawi ka Truck wa kit mooria.
Ha kini ki ar tylli wa jia, kiwa yap da em ki 34 ngut.
Ka Supreme Court da ong ko wa ki National Highway man ki du kamwa 2% na ki sarok hapoh ka ri tangwa kiwa yap ha ki man ki 30% na waroh kiwa yap nei jia mynsoo.
Kamtæ da khang wow pynyieñ khlem da yoh bor ki Truck kamjooh waroh ki kari wa heh kiwa kamai ha rood ki sarok National Highway lait noh ha ki thaw wa da booh yow pynyieñ ki.
Da phah leh ya ka NHAI wow booh ki Truck Lay-Bye ha man 75 Km deilang ki kari khwe wa ki Ambulance.
Discussion about this post