Jowai: Kam chibynta wow yada nei poor ka khlam u COVID-19 ym du ka sorkar tangwa wot ki dorbar chnong leh em ki ka bynta wa kongsan wow yakhun pyrchah ya kani ka khlam khnang wow yada ya ki paidbah ka chnong.
Ha kani ka kynti ki 12 chnong na ka thaaiñ Iooksi Saphai, wa kynthup ya ka Saphai, Iawthymme, Priang, Umdienlien Iooksi, Iooksi Mynsar, Thlongmo, Umsalait, Tongkiad, Lakadong, Pohkseh, Khonchnong wa Nongryngkoh ynne ka sngi da chong pyrkhat ki kammon wow pynjanai yei yada na kani ka khlam.
Kamtæ ha kani ka yalang da rai wow khang ya ki bru kiwa na baar chnong wow wan tlep ya kiwa da khlaad hapoh kini ki chnong.
Neiliang kini ki chnong da kyntu ki ya ki paidbah wow man ki kiwa bood ya kani ka rai neibynta i bha i miat yong kiwa boon wa lang.
