Ynne ka sngi ki bor District ka West Jaiñtia Hills District wa kynthup yaka D.D. Syngai EAC, ka Y. Mawlong EAC deilang wa ki bor pulit da hiar li khang ki yaka Iawthymme kawa mantre daka JHADC hadien wa chem wym em biang i rukom pynlai ya kani ka yaw neibynta kiwa chongdai heiyatoh wow yada nei poor u khñiang COVID-19 katkam wada hukum daka sorkar lyngba ka chnat i chait i khiah itæ toh yow yajngai iwi yei wi najrong kiwi won ki kyndon.
Katkam wada pynbait da ki bor District, ynne toh ka sngi u wai du neibynta kiwa dai mar baam nadooh i por 9 waje i step hadooh 4 waje i janmiet, hadien wada kdoh da khoom yaka chnong Jowai hapoh ki ‘Containment Measures’ nadooh ka 1 tarik, tangwa ka yaw JHADC da chah khang noh ko du hadien chipor wa wai ya neidaw wym biang i rukom pynlai khamtam i rukom chongdai. Kamtæ u wai won yaka hadien wa da ye u pynbait.
Hei yaklam wa u waheh chnong ka Ladthadlaboh u L.D. Lakiang khana u wa neilang ka Ladthadlaboh waka Dongmihsngi da pyndep ki yei kaamram wow pynbna wa haka sngi Monday, Wednesday waka Friday daw e laad ya kiwa dai mar baam.
Tangwa ynne ka sngi won ha kani ka Iawthymme da man kawa yoo kulmar katwa toh ka yaw kawa heh, heiwa da wanrah ko i eh i khoo neidaw wa boon bru ware.
“I eh hi ha kani ka yaw toh wot hawa da mih ka hukum na u Deputy Commissioner ka District leh, ka JHADC kawa mantre ym em chim ko iwon iwon i bahkhlieh næ wot wow pyntip cha ka dorbar chnong kam ka Ladthadlaboh næ ka Dongmihsngi neibynta u leh ki iyi re iyi heiyatoh wa i chongdai deiwa bood da ka Odd wa Even Number,” ong u L.D. Lakiang.
Da ong chooh chooh u wa ki bru wa em License leh toh ka JHADC hi wa tip, i thaw leh toh i yong ka wei ka hi wa man kam ka Market Managing Committee, kamtæ kwah ki wa ka District Council u wan ko chakhmat yow pynbait yeini, neibhah kam ki dorbar chnong man ki kam kiwa yarap donhi.