I thmu ka Meghalaya Energy Corporation Limited (MeECL) wow pynman ya i pynsñiaw paidbah namo ka Public Hearing wow chna ya ka Dam ha ka Wah Mynngot ynne ka 8 tarik da pep noh ko hadien wa da ki spah ngut ki paidbah na ki chnong kam ka Umsawwar, Mawsir, Mawdulop, Ksangrngi, Jatah Nonglyer, Jatah Lakadong, Mawlong, Mawjatap wa kiwi ki chnong da pyrchah joor ki yeini.
Ya kani ka Public Hearing wow chna ya ka Umngot Hydro Power Project da pynman ha ka chnong Siangkhnai, Mawkynrew Block, East Khasi Hills District, tangwa ki paidbah da khang luti noh ko ya ki wakreh ka MeECL, MPCB wa kamjooh ki bor District ha ka chnong Mynsang chwa wow poi kani ka thaw.
Neiliang ki paidbah na ki 8 chnong kiwa da mih wow pyrchah ya ini i thmu wow chna ya ka dam toh neidaw wa ktah ko ya ki thaw rep wa ki khloo wa da pynneh kyrpang ha kani ka thaaiñ, wei kiwa boon im ki na i rep donhi.
Hanla em i pyrchah na kiwa boon, da em leh ki paidbah na ki chnong kam ka Nohron, Syntung, Jatah Nonglyer, Siangkhnai Nonghulew wa kiwi kiwi da kyrchaan ki ya ini i thmu wow kah namo u chna ya kani ka Hydro Power Project.
Neiliang kiwa chong chnong kiwa kyrchaan ya kani ka Project da ong ki wa daw wanrah ko yei myntoi ya ki paidbah kiwa chong chnong ha ka thaaiñ, heiwa da ong leh wa kam kani ka Project da thmu nadooh u snem 2006, tangwa da sepai ko neidaw wa thut ki kattu katni ngut.
