Shillong: Kiwa chong chnong wa kynthup ya ka Upper Mawprem, Jhalupara, Mawbah wa Nongsohpoh da pyrchah joor ki yei thmu wow thang ya i metyap yong u Dr. John Sailo Ryntathiang ha i thaw thang wa em ha Jhalupara, uwa da khlaad noh neidaw u khñiang COVID-19.
Katkam i pynsñiaw kiwa yahkhmat yong kitai ki chnong da ong wa ki paidbah tieñ ki lada wanrah ya i met u Doctor, ki paidbah ym e laad ki wow wanrah ya i met wow thang ha katai ka thaw wei daw mih bait i pyrchah ha kawon kawon ka por. Kini kiwa yahkhmat chnong da pynsñiaw ki leh wa kam ka chnong hap ki wow ap ya i sur ki paidbah neibhah ym ye wow pyntikna wa ym em i ktah lada wanrah wei thang ya i met ha katai ka thaw.
Chooh chooh kini kiwa yahkhmat chnong da ong ki lada ka sorkar da dep ko wow pynkhreh boon ki laad wow yada na i kjut, da toh leh wow pynbiang ya ki thaw wow tyllep næ thang ya kiwa khlaad cha kiwi ki thaw wa jngai na ki chnong yow lait na kiwon kiwon ki artatien.
Ini i pyrchah yong ki paidbah man ko hadien wa ka sorkar India da phah ko wow pynbiang ya i sap i spaiñ ya i met uwa khlaad.
Kiwa chong chnong kiwa em da ki spah ngut da mih paidbah ki ynne i janmiet wow pyrchah, khlem da bood de yaki laad yada wa da phah da ka sorkar, wym toh u yalang paidbah næ yajan para bru. Rap hadien ya kini ki paidbah da ye wow pynpra wei beh noh da ki bor pulit wa ki Magistrate.
Neiliang ka Dorbar Shnong Nongpoh Proper leh pyrchah ko yei paan bor u khon yong u Dr. Sailo wow tyllep yow pa u haka Farm House yong oo wa em ha Nongpoh Proper.
Da ong wa ki daw toh wa kiwa chong chnong katni dang em ki hei sier mynsien, neidaw waka Farm House em ko hapyrdi chnong Nongpoh Proper wei neidaw wym em leh kiyi kiyi kiwa ye u pyntikna wow yada wa pura hajrong ini.
Discussion about this post