Kiwa boon ki bru wa chong pyrchah aiñ ha kawi ka thaw ha Lum Survey da khang ki ya jar jiar ki yung ki sem ynne ka sngi wei ini da jia hadien wa da tip wa em i wan pait wan sylli da ki bor sorkar deilang waka seiñ HYC.
Kani ka thaw toh kawa chong chnong pyrchah aiñ da ki baar jylla iwa em ha kylla ka Them Ïewmawlong ha i thaw wa tip kam i Lum Survey heiwa ynne da emlang leh ki bor pynlai District ka East Khasi Hills, ka yung krehkaam u Defence Estate Officer (DEO) kamjooh ka Shillong Cantonment Board (SCB) kiwa da hiar cha katai ka thaw wei da chem wa kini ki bru da em ki kamwa 80 yung.
Ha kani ka lai sylli da chim leh yei pyrtuid yong ki bru kiwa sah ha katai ka thaw.
U President ka HYC, u Roykupar Synrem da khana u wa i lai pait da mankaam ko hadien wa ka seiñ da kyntu ko yei emkaam wow lai sylli lang wa kiwi ki bor sorkar wei da e por ya u Deputy Commissioner wow leh iyi iyi hapoh chi tayaaw.
Da khana u leh wa ka seiñ da yachem ko wa uwi u bru wa yakhun mukotduma uwa da khana wa da leh u yeini du yei bynta i thaw wa booh nar jæd tin jæd u iwa man kam i khih u wei ka mukotduma ymtoh neibynta ki bru wa sah ha kani ka thaw.
U Roy da khana u leh wa ka rai wa khaddooh wow kyrriah ya kini ki bru toh u chim da ka yung krehkaam u DEO, wei ka seiñ daw booddien ko wa ki bor pynlai District hadien wa da e ki yaka Report.
Uwa yahkhmat ka HYC da maham u leh wa ka seiñ ym yang slem ko wei lada ki bor wa toh u pait ym ye ki wow leh smat yei kaam, ka seiñ daw leh ko yeiwa emkaam wei ha itæ i por lada mih iwon iwon i jia, ka sorkar wa ki bor wa toh u pait daw hap ki wow chim yei kitkhlieh.
Discussion about this post