Ka North Liberty Higher Secondary School, Jowai kawi naki skur ha Ri-loom Jaiñtia kawa jooh bna naam bha haki Result SSLC wa HSSLC ha kani ka kynti leh haka Result HSSLC 2024 Science Stream wa da pynbna ynne ka sngi da ka MBOSE, kani ka skur da yoh rah biang ko yei naam lyngba i psiah ki ar ngut ki khynroo puræ yong ka haka thup Top 10.
Kini ki ar ngut toh u Weibha Nongtdu Lakiang uwa da poi haka kyrdan 6th Position deiwa yoh 93.2%, wei yoh Highest Marks u leh haka Subject Mathematics deiwa yoh 100 na 100.
Neitæ u Joshaviah Onan Paswet uwa da poi haka kyrdan 7th Position deiwa yoh 92%, wei yoh Highest Marks u leh haka English deiwa yoh 91 naka 100 wa haka Mathematics deiwa yoh 100 na 100.
Hei yaklam wa u Principal yong kani ka skur, u Richard B Uriah, da khana u wa napyrdi ki 35 ngut kiwa yakhun yaka HSSLC Science Stream waroh Pass lut ki heiwa 29 ngut kiwa yoh First Division, 6 ngut won haka Second Division. Wei kini ki ar ngut wa da rah naam yaka skur toh kiwa puræ ha kani hi ka skur nadooh dang khian.
Ong u leh sñiawdiaw kajiak neidaw wa sa ar ngut ki khynnah dooh ki wow psiah haka thup Top 10 deiwa duna kattu katni Marks donhi.
Heiyatoh wa ini i jop, neiliang u Weibha Nongtdu Lakiang wa u Joshaviah Onan Paswet ong ki nyngkong dooh toh u chaniah ha u Blai wei wow paan leh i stat i chemphang na oo, neitæ toh u chaniah wei ngait leh yeiwa hikai kiwa sikai.
Waroh ar ngut kini ki kynroo em ki i angnood u lai puræ Medical wei dang dep thoh wot ki leh yaka NEET.
Neiliang ki bei ki pa yong kini ki khynroo leh pynsñiaw ki yei kmen wa khroo yei rah naam ki khon yong ki, kamtæ kyntu ki ya kiwi won ki manbei manpa wow man kiwa e mynsien kiwa pynchlur yaki khon ki kti ha kawon kawon ka sap wa ki em ki kamwa ki leh ya emlang bait ki ha chrooh ki khon neibynta u e mynsien wei pynchlur yei kaam wa bha wa ki leh ki.
Heijooh i por leh wow sneiñ wow kroo leh yaki khnang yow lai ki haka luti wa bha hei im yong ki.
Discussion about this post