Ka KSU-EJHDU ynne ka sngi hapoh i yahkhmat u President, u Streamly N Suchen, u Satly Ryngkhlem Vice President wa u KS Suchiang kam u General Secretary deilang wa ki phaw ngut ki dkhot da khang tala ki ya ka Toll Plaza wa em ha Lumshnong wei da pynsangeh yei khrong dan heitai.
Yeni da leh neidaw wa joor ware i sih u sarok NH06 heiwa ka seiñ ha ka 13 tarik uni u bnai da yoh ko wow yachem wa u ADC ka East Jaiñtia Hills District wow dawa ya ki bor synchaar District wa ya ka NHAI wow pynchna smat ya uni u sarok uwa da sih nadooh Tuber hadooh Malidor.
Tangwa neiliang ka sorkar jylla kamjooh ka NHAI ym bna ki yeini.
Hajrong kani ka yurim wa ka seiñ ym yohsa ko wow khang khyrdep ya kani ka thaw khrong dan khlem da yahaap wa i rukom man u sarok.
Kamtæ ka seiñ da ong ko wa ka NHAI daw hap ko wow chna chwa ya u sarok wei hadien daw chah u wa wai ya kani ka Toll Plaza.
