Jowai: Ynne ka sngi ka 23 tarik, ka KSU-JHDU hapoh i yahkhmat u President ka seiñ u Ohibait Dkhar deiwa ya krehlang ka KSU Narpuh Circle waka KSU Khliehriat Circle da khang tala ki ya ka Toll Gate wa em ha Lumshnong, EJH.
Ki daw wa pynman ya ka seiñ wow leh ya ini toh wa da kut por wa 5 sngi wa e ya ki wakreh kani ka thaw ki baar jylla wow pynbiang ya ki kot ki sla wa emkaam kam ka Work Permit ki wakreh wa Trading License.
Ka seiñ da pyntip ko wa da dep yachem wa u Anup Bal uwa na Kolkata uwa man u Contractor yong ka Eagle Company Pvt. LTD., uwa da chim wai ya katai ka Toll Gate na ka NHAI wow chim dan. Ha i yachem haka 8 tarik uni u bnai, ka seiñ da dawa ko wow pynbiang ya ki kot ki sla wa emkaam hapoh ka 5 sngi, tangwa hadooh wa khang tala syndon ynne ka sngi da chem tang uwi u baar jylla leh ym em ki ya kitai ki kot ki sla wa emkaam.
Chooh chooh ka seiñ da chem ko leh heipor wa lai sylli ya u sarok da ka KSU Narpuh Circle dang ha kini ki kajiak sngi da chem wa nadooh Mynkre hadooh Ratacherra u sarok da man u uwa da sih. Ka seiñ da ong ko leh wa da sñiaw ko yei ood ki paidbah ki paidbah, wei hajrong kani ka yurim ka seiñ da lai pait ko hadooh katwon wa sih u sarok.
Kamtæ ka seiñ ka yieñ pyrchah joor wa kammon kani ka Company ye ko wow chim dan na kiwa lai wa wan katwa ya u sarok won ym pynchna ki.
Ka seiñ da ong ko leh wa daw lai khang tala sa ya ka Toll Gate wa em ha Ialong, West Jaintia Hills kawa pynlai da ka jooh ka Company wa da u jooh uwa chim wai.
Also Read: Maham beh ka KSU ya ki wakreh Toll Gate ha Lumshnong
Discussion about this post