Ynne ka sngi chwa wa ki san seiñbhalang wa kynthup yaka KSU, FKJGP, HNYF, RBYF, JSU u pynman ki yei thang mombati ha laad Kiang Nangbah College, Jowai kam chibynta u sñiawlem yaki 5 ngut ki bru paidbah ka chnong Mukroh kiwa da chah siat yap haka 22 tarik uni u bnai ha ki pulit ka Assam, da sakhi wa nadooh dang step boon ki dukan khamtam kiwa mantre da ki baar jylla da khang lut ki neibhah wa em kiwa lai phah khang ki wada suba leh toh ki seiñbhalang.
Ha kani ka sngi da sakhi leh wa ki dkhot seiñbhalang deilang i tymmoh yei dur da ki that wa yong, da lai ki soodong ka chnong Jowai da ki kari wei phah liwan ki leh ya kiwa kreh sorkar kamjooh leh kiwa kreh Bank.
Hawa lai ki kylleiñ i bynta ka chnong Jowai da kbai haroh ki yei kyntien beiñ sorkar jylla wa yaka sorkar Assam hajrong i jia chah siat yap ki 5 ngut ha Mukroh.
Neitæ hei janmiet haka yalang thang mombati da yoh i klam naki kattu katni ngut kiwa yahkhmat seiñbhalang kiwa da beiñ joor yaka sorkar deiwa ong du neidaw wa kheiñstiñ ki sorkar haki 50 snem chadien, da jia i chah pynyap neipor chei por.
U Erwin Sutnga uwa yasaaid aiñ uwa joh man leh u dkhot seiñbhalang nachwa hawa klam ong u hei sakhiat ka sorkar jylla toh u li kem ko ya kiwa emkti siat yap wei bichaar yaki ha Jowai, neibhah ka aiñ kreh ko i jooh ya waroh, wym du wa toh ka sorkar Assam u yoh u leh ki katwa ngait.
U Garland Rymbai, Secretary warim ka JSU, da ong u i daw wa kongsan i jia toh wym em ya u pood u ang wa che, wei nadooh wa chim yaka jylla da leh jhan tang yow yoh chong Secretariat khlem da pyrkhat ya kiwa rap pateiñ kamtæ ki 50 tylli ki snem lai luti ki dei jia wa chyrkhei chyrkhei.
“U ong O ya u pood u ang ka sorkar Meghalaya waka Assam wym em bor ki wei wym ye ki u leh iyi iyi, neibhah ka bor wa hakhlieh chong haka sorkar bei kamwa da thoh haka kyndon wa skem bha yong ka Article 3 ka riti synchaar ka ri India, wa toh i bor yong ka Parliament wow pynbait yeini,” da ong u Garland Rymbai.
Deiwa pynrap leh wa neiliang ka synchaar khadar yong waroh ar ki jylla ka Meghalaya wa Assam da dep ki yei kaamram iwa sah katni sa du naka sorkar bei wa kammon u pynyoh ko yow pood u ang wa che.
Yow mankaam i kajia pood ong u du kawi ka laad itæ toh u khang noh yaka Election haka jylla, wei lada wan ka President Rule leh ymphær hi, neibhah lada leh kamtæ du hapoh 5-6 bnai i kaam kajia pood leh da bait ko.
Hajrong ini da e yumut u ya kiwa yahkhmat seiñbhalang u yatylli wei wow lai daka luti wa jai-jai cha kylleiñ ki thaw ka jylla u pynsñawthooh paidbah wa toh u khang pynman Election, lym kamtæ ym em de da kawi tawon ka laad.
Ong haroh u yow jop ya kani ka phang toh u man kiwa jai-jai wymtoh deiwa pynchit yaki paidbah næ wanrah i mih snaam.
Kiwi won wa e i klam kynthup ki ya u Riki Shylla, General Secretary FKJGP, u Army Lypon, President Synjuk Waheh Chnong Ri-loom Jaiñtia, ka Deiwi Tongper naka STIEH wa kiwi haka yalang wa pynlai da u Treibor R Suchen, General Secretary JSU Central Body.
