Jowai : Hadien wada khih u khmi uwa joor yow wa da sdang na ka jylla Manipur haka 4 tarik i step u Duyatra (January) 2016 ynne da khih biang u khmi wa joor yow wa da sñiaw chadooh ka sorbah Kolkatta wa Patna.
I tre uni u khmi toh na khappood ka ri India wa Myanmar wei da khih u ar sien heipor kamwa 7:25. Ya uni u khmi da thaw kamwa 7.0 wa 7.2 ha u Richter Scale wei yillu u kamwa 150 km chapoh khyndaw wei jngai u kamwa 177 km na ka chnong Mandalay wa em ha ka ri Myanmar.
Uni u khmi da neh u kamwa duna 2 minit uwa da pynbor ya kiwa chong dukan wa ki paidbah u mih ki cha sarok chalait, heijooh ipor kiwa kreh ka MeECL da haap ki u pyndooh ki ya ka lait.
Ha ini i jia da boon ki manyung wa ki dong wa chah ktah ha chnong Jowai ha uni u khmi yeiwa ye phi u sakhi ha ki dur hawah kam ka yung club ka Caroline Colony, Dongmihsngi, KNGC Quarter, wa kiwi kiwi.
Neiliang u Wyrta daw booddien u yei ktah uni u khmi wei hei yaklma wa i ki stad hei yatoh wa u khmi da ong ki wa uni u khmi ye biang u u khih heiwon heiwon i por, kamtæ toh u man i kiwa da pynkhreh la heiwon heiwon i por.
Discussion about this post