Kamwa 6 ngut ki bru da dooh ki yei mynsien wa da ki dorjon kiwa da mynsoo hadien wa khih khmi ha kiwa boon ki chnong wa em haka ri Croatia heiwa u khmi wa khih toh uwa khlanbor 6.4 haka Richter Scale ynne ka sngi.
Hadooh katwon da ktah uni u khmi ym pu tip neidaw wa smat noh u sep ka sngi heiwa da wan leh ki chipai wow yarap thooh ya ki bru ki wym pu em chem.
U khmi da khih u heipor hadien chiteiñ sngi ha ki thaw wa em kamwa 48 Km naka nongbah ka ri ka Zagreb, wei ya uni khmi da sñiaw leh cha ki thaaiñ Balkans wei chadooh ka ri Hungary. Da em chwa u khmi wa rap duna bor (5.2) uwa da khih chi sngi chwa.
I thaw wa sdang uni u khmi toh hajan ki chnong Petrinja wa Sisak, kawa em leh ka Hospital wa heh dooh kani ka thaaiñ kawa ym ye de wow pynemkaam neidaw wa da joor chah ktah i, hanla kiwa boon kiwa mynsoo da pynkit cha kani ka Hospital. Ka sorkar leh dang yaleh ko wow kyrriah ya ki 40 ngut kiwa yoh COVID-19 kiwa em ha kani ka Hospital.
