Ha iwi i jia wa sñiawsih wei sñiawma wei sñiaw chyrkhei, ar ngut ki chi payu da dooh ki yei mynsien nei chah pam pyrthat katwa dang yalehbol ha madan Makreiñ kawa em ha ka chnong Mawsnapwir kawi na ki chnong ha ka thaaiñ Umïap, West Khasi Hills District.
Da khana wa ha ini i jia pam pyrthat da em boon ngut kiwi kiwa da mynsoo joor kiwa na waroh ar liang kiwa yalehke heiwa da em leh boon ngut kiwa pat wa paar ha madan.
Da pyntip wa kini ki ar ngut kiwa chi payu toh kiwa wan sah wai ha ka chnong Lawrapha wei da antaad wa da kynjoh ki cha ki 20 snem i rta, wei ini da jia i heipor kamwa 3:00 waje i sngi ynne ka sngi heipor wa dang joor u slap wei dang jwat bha ka yalehke hapyrdi ki arliang.
Uwi u khynroo uwa em harood madan da khana u wa hadien wa jia itai, neiliang yong oo wa kiwi da pynkit noh ki wut-wut cha thaw sumaar ya kiwa mynsoo.
Da khana u wa napyrdi ki ar ngut ki chipayu, u payu da yap u ha madan katwa u diah da antaad wa yap u ha luti wa dang lai cha St. Joseph Hospital Nongstoiñ.
Da khana leh wa napyrdi kiwa mynsoo da em kiwa da rah noh cha Civil Hospital Nongstoiñ wei em leh kiwa da sumaar ha St. Joseph Hospital Nongstoiñ wei hadooh kattæ ym pu tip tikna hadooh katwon ngut wa mynsoo joor.
Discussion about this post