U Chadwick Boseman uwa act kam u Black Panther ha ki phlim ka Marvel Cinematic Universe da khlaad noh u ha yung wa sah u ha Los Angeles hadien wa chitom u naka Colon Cancer la 4 snem wei da em u 43 snem i rta.
Kiwa ha yung u da pyntip u wa heipor wa act u ya ki phlim nadooh ka Marshall hadooh ka Da 5 Bloods da leh u hapyrdi boon sien wa chah pooid kamjooh i leh Chemotherapy wei iwa man i burom wa khroo dooh ya oo toh u wow act kam u King T’Challa haka phlim Black Panther.
Kam u T’Challa da mih nyngkong u haka phlim Captain America: Civil War ha u snem 2016 wei hadien ar snem da mih ka phlim Black Panther kawa da kamai ko $1.3 Bn ha waroh kawi ka pyrthai hadooh wa man ko kam kawi na ki kyrtong yaka Best Picture haka Oscar kawa man leh du kani ka phlim wa pynmih ka Marvel Studio wa chah jied ha ka Oscar.
U Boseman iwa khaddooh wa pynbna u ha Twitter toh i kyrchaan u yaka Kamala Harris kam ka Democratic Vice-President Candidate haka ri USA.
Ka Kamala Harris da ong ko wa sñiaw piah nood yeini khlaad u Boseman uwa man u bru wa sbun, uwa sñiawkhian wei da ieh smat u ya i tangwa ha i im yong oo da wanrah u chiboon i kylla.
U Boseman da act u leh ha ki phlim chaphang ki bru wa pawanaam kam u Jackie Robinson wa u James Brown.