U khon khian u (L) E K Mawlong, uwa man leh u Montri Rangbah warim ka Meghalaya uwa man leh u diah u MLA ka Umroi, u George Lyngdoh uwa tip pyrtuid kam u Ferdinand Banshanlang Lyngdoh da khlaad u ynne ka sngi hadien wa ka kari Bolero wa yah u da kopdiñ ko syndet syndet ha chnong Umsalem, Ri-Bhoi.
Ini da jia i heipor kamwa 11:00 waje i step heipor wa lai luti u na Tura cha Shillong wei yei daw wa kopdiñ ka kari u ym pu tip.
U Ferdinand man u leh kam u Assistant Professor ka Department of Basic Science ha Community Science College wa em ha Sangsanggre, Tura.
Yei ini i diñ ym ye wow tympleh da ki kari tympleh diñ kiwa wan na Umsning wei dang pynman yei takit yow tip yei daw wa sdang i diñ iwa da poor smat chapoh ka kari.
U Ferdinand da man u leh u payu uwa thoh khubor na Shillong u Andrew Lyngdoh. Neiliang ka Shillong Press Club leh da phah ko yei khubor sñiawlem cha kiwa hayung u Ferdinand.
Ya u Ferdinand da kha ha ka 31-08-1984 wei da man u leh u pa yong i khon kynthai.