Shillong: Neidaw wa mynsoo joor ha ki bynta i khlieh hadien wa chah dat ha ki damok ha ka chnong Mawlai Nongpdeng iwa da jia ha ka miet yong ka 10 tarik uni u bnai, uni u bru wa chah dat wa tip kam u Antistone Rani (39 snem) da khlaad noh u ynne i sngi ha NEIGRIHMS.
Katkam ka yutip, ini i chah dat khiar u Antistone Rani da jia i heipor kamwa 10 waje tam ha Mawlai Nongpdeng (Block-B) katwa dang liwan u cha yung hadien wa wan mylla, wei da yachem u wa uwi won u lok u ha Mawlai Nongpdeng marjan wa em ‘Transformer’ wow pynbait khwe dakha ha ka sngi wa bood. Tangwa katwa dang yaklam ki da em soo san ngut ki damok kiwa hapyrdi 25 – 27 snem kiwa da suba wa da muaid drugs da kynroi ki ya kini ki ar ngut.
Hapyrdi ini u Antistone da pyrchang u wow pynsñiawthooh wei wow pyn-yakhlad, wei mar heitæ da dat khiar ki oo da ki tiar wa ki moo wow dat oo na ki ki bynta i khlieh.
Da ong wa i rukom dat toh dei thmu wow tynyap khlem wyrai de, neibhah da dat bait na i bynta i khlieh hadooh wa da pat u ha madam khlem tipbru de.
Hadien kattu katni por kiwa hayung yong u Anistone kiwa em ha Mawlai Nongpdeng da chem ki ya oo ha sarok wei da pynkit noh ya oo wut wut cha thaw sumaar, tangwa hadien chi tayaw tam wa chah sumaar u ha ICU ka NEIGRIHMS khlem tipbru, u Antistone da khlaad noh u ynne i janmiet ha CCU (Critical Care Unit).
Kiwa hayung yong oo da ong ki wa u Antistone toh u bru uwa im chisur waroh chi rta wei uwa ymjooh em daw weiyi weiyi leh.
Nachwa toh uwa sah ha Jaïaw Laitdom wei nadooh wa khlaad ka bei u, da lai sah noh u wa ka Meideng u ha Mawlai Nongpdeng dang du kattu katni por.
Hajrong ini i jia kiwa hayung da ujor ki ha ki pulit ka Mawlai Police Station ha ka 12 tarik uni u bnai wei neiliang yong ki dang yoh kem ki dang du ya uwi uwa suba wa emkti ha kani ka kaam, ya uni uwa chah kem da tip kam u Banjop Dkhar wa chong ha Mawlai Nongpdeng Block B.
Neiliang kiwa hayung wa ki lok ki jor da dawa ki na ki bor ka aiñ wow chimkhia yeini wei wow kem lut ya waroh kiwa emkti ha kani ka kaam.
Hawa yaklam wa u rangbah shnong ka Mawlai Nongpdeng, da ong u wa ka chnong dap ko dei sñiawkhia hajrong ini i jia waroh wei da beiñ ko leh ya ki damok wa leh ya ini i kaam.
Da pyntip u leh wa ka chnong daw pynman noh ko dei yang miet namo wow sonteri ya ki sarok wa ki luti syngkieñ hapoh ka chnong ka thaw.
Discussion about this post