Chispah sanphaw soo snem nachwa,
Ya u khla ka wait da kha.
U wa kit, wa da, wa diang, wa bah,
Ha i yung ka ‘Rimai Nangbah’
Ka kur ka jait nangku nangkhroo,
Na wym yoh ki khmat u yoo.
Wym em wa dooh, wym em wa yoh,
Ha ka kur, ka jait ‘Sookpoh’
Ya ka chnong wa kha, u sah parom,
La hei trep hei skum, yanom yanom.
Pateiñ la pateiñ, u makhane,
Ya i pyrtuid ka dong ‘Tpep Pale.’
Nei jinglong khynnah, khynroo, rangbah,
Cha lyngkha wa wakhu, wow rah.
Jait wa da thoh chuni ki Blai,
U sakhi ki khmat, ha i por wa lai.
Ki dohlieh da sdang u khrong khajna,
Ki wym yoh u e, chah kynjet kchu ja.
Ka rangli, ka kup ka sem chilliang,
Kawa tip kam ka ‘Lakhi Pyrdiang’
I thij, i pyrkhat da takha,
Kammon u leh, wow lait khajna.
I mynsieñ wym suk, pisa lang-a,
U paan ka laad naka ‘Bei wa kha’.
Wyrta chula da kbai, da kyrha,
Kylleiñ ki chnong, ki elaka.
Dorbar ka ri khat ar Dolloi
Ka rai wa hok, chukor wym hoi.
U paan u doon, ka nia wa yutang,
Blai loom, Blai wah, wow ya em lang.
Wow yieñ, ka kular, wow yieñ ya emlang.
Wow yieñ ka kular, wow yieñ ka rai,
Ha madan, ‘Madiah kmai Blai’.
Da hun lang na bru ha Blai,
Wow man u wa mih khmat ri Pnar.
Da tayar ki wait, khnam yong o,
Wow yada ya ka chaad ‘Pastieh kai ksoo’
Da phet da rieh na ki wa choon,
Cha chnong ‘Tynser’ ha khap ki loom.
Ki wa bood wow chna, ki wait ki soom,
Yoh u pynhær ya ki wa choon.
Ka spah, hajar wa pah wa phon,
Paradoh para snaam, kylla dusmon,
Hadooh wow yap, ha u dieñ pasi,
U who Kiang Nangbah, ‘Khlawait ka Ri’
Discussion about this post