U SP ka West Jaiñtia Hills District, u Jagpal Singh Dhanoa hawa khana yeiwa jia ynne hawa lai kiwa rep ka Lapangap cha ka thaw rep wa em rap chakhmat ka Police Camp ka Assam heiwa ki pulit ka Assam da kular ki wow ya krehlang tangwa da em ki kattu katni ngut ki bru paidbah neiliang ka Assam kiwa da mih dei thmu wow pynthut yei suk i saaiñ yow khanglaad ya kiwa rep.
Da pynche u wa kani ka thaw toh kawa em i yakajia lada em ko hapoh ka Assam næ Meghalaya tangwa yei mantre won yei thaw rep ym em artatien wa mantre da kiwa chong chnong ka Lapangap. Wei kini kiwa wan pynthut neiliang Assam toh deiwa em i thmu wa sih wow khang ya kiwa na Lapangap kam ki tre thaw wow rep ki ha i thaw yong ki iwa da leh nadooh ki por yongrim.
Da khana u leh wa heipor wa dang yaklam wa ki pulit na Assam, da yoh Phone na u MLA ka Assam uwa mihkhmat ya ka chnong Tahpat uwa da kyrpaad yow lait i jia wa sñiawsih wow e por ya oo chi sngi u pynche wei pynyasuk wa ki paaid Karbi.
Kamtæ deiwa pyrkhat yeiwa bha yonglang hanla da hap maad kiwa rep yei eh, da e por chi sngi ya kiwa na Assam wei yow ap iyi rai ki.
U SP da ong u wa ynne hi ka thong toh yow lai yah ya kiwa rep tangwa neidaw wa em kani ka thaw rep chakhmat ka Police Camp ka Assam, da emkaam yei ya krehlang kamwa leh heipor wa lai ah kba ini wadep. Tangwa kattæ hi ym kwah wow em i pynyoo bor, kamtæ da kyntu ya kiwa rep wow e por ki chi sngi ya u MLA ka thaaiñ Tahpat deiwa kyrmen wow yoh u rep dei suk wa deiwa neh yanom.
Heiyatoh wa ki SF-10 won, da ong u wa da em ki ha luti.
Discussion about this post