Ynne ka sngi hawa yaklam wa kiwa pathai khubor, u President ka Seiñraij Jowai, u OR Challam chirup wa u Dolloi ka Elaka Jowai, u Puramon Kynjing da pyntip ki wa ka Behdieñkhlam ha uni u snem hadien wa wan ka khlam kjut ha ki ar snem, ha uni u snem 2022 u pyndep ya ka khlem kiwon kiwon ki kyndon kawa daw sdang ha ka 11 tarik wei daw pynkut ha ka 14 tarik uni u bnai.
U Challam da ong u wa ka Behdieñkhlam emyatoh bha ko wa ka kjut khlam wa wan ini wadep, neibhah lyngba i ngooh i dem tæ da ye wow yada u kær ya kiwa boon, deiwa ngait skem wa ka Behdieñkhlam ha uni u snem u man ko kawa heh bha neibhah u man ko chirup wei dap 50 snem ka jylla wa 75 snem ka ri.
Da pyntip u wa ha uni u snem ka Behdieñkhlam daw pynman chirup wa ka NEC, ka chnat Arts and Culture ka jylla, ka JHADC wa kiwi kiwi.
Chooh chooh u Challam da khut sñiawbha u ya waroh ki paidbah wow wan sakhi wei wow wan pynphooh ya kani ka lehniam yow yoh yei bha i miat wa i kyrkhu kyrdoh liang wanang.
Heijooh i por da pyntip u wa ka Aitnar da chna pynheh ya ka katni lyngba ka chnat Tourism ka ri India wa lyngba ka chnat ka jylla wei da yooluti u pyndep ya ka ha u snem wow wan.
U Dolloi ka Elaka, u Puramon Kynjing da ong u wa da pyndep ya ki bynta ka sarin yong ka Lehniam Behdieñkhlam heiwa hanla chah ktah ki hali ki pynthor wa kiwi kiwi ha ki bnai wa dadep ha u slap wa joor tangwa ki Blai ki Syiem wa ka Bei Rymaw daw theh ko ya i kyrkhu kyrdoh ya waroh.
Da kyntu u leh ya kiwa chimbynta wow man kiwa pynphooh pynphieñ ya ka khnang wow man bha man miat ya waroh lang.
Neiliang u President wa u Dolloi da kitbok kitrwiang ki ya ki paidbah heiyatoh wa ka Behdieñkhlam wow man ko kawa suk wa kmen ya waroh.
