Ynne ka sngi ka Executive Committee ka JHADC hadien wa lai pait ko ya u pood ka chnong Mukroh da yachem ki leh ya ki waheh ka chnong wow ap u sñiaw yow tip yeiwa sakhiat wei wow tip yeiwa kwah wei angnood ki paidbah ka chnong.
Hadien i yachem wa ki waheh ka chnong hawa yaklam wa kiwa pathai khubor, neiliang u CEM ka JHADC, u Thombor Shiwat da ong u wa i daw wa wan ka EC cha Mukroh ynne toh hadien wa mih i jia wa sñiawsih hadien wa chah siat san ngut kiwa chong chnong ha ki pulit ka Assam wei kam ka Council kawa toh u pait ya i khyndaw u chyiap wa u pood u ang ki chnong wa ka Elaka da hiar noh ki ynne cha ka chnong.
Chooh chooh da ong u wa ynne da hiar ki cheini wow pynsakhiat ya ki kot ki sla ki khyndaw wa da em kiwa chong chnong ka Mukroh wa dadep Register ha ka Council wei ynne da rah ya ki kot chirup wa ki Map wa kiwi ki kot ki sla wa emkaam.
U CEM da ong u leh wa da em leh i kyntoor pood (Encroachment) na ka jylla Assam wei da booh leh ya ka yung krehkaam ka chnat khloo ka Assam pyn chapoh u pood ka chnong Mukroh wei da booh ya kani ka yung krehkaam leh khlem paan bor wei khlem thoh cha ka JHADC.
Heijooh i por da ong u wa lada emkaam thaw hapoh u pood ka Council emkaam wow yoh NOC na ka Council tangwa ka Assam ym em u pyntip ko cha ka JHADC wei wot cha ka chnong Mukroh.
Neiliang u Thombor da ong u leh wa waroh ki thaw ha ka chnong toh u wan biang ki chapoh ka Mukroh neibhah katkam wa pyntip ki waheh da jooh lai liar ki ya u pood u ang ka chnong man-u-snem wei ka Assam leh tip bha ko yeini tangwa ka sorkar Assam em ko i thmu wa cha lyndet neibhah da lai pynjæd tympra ki ya kini ki dak ki chin.
Da kyntu u leh ya kiwa chong wa lada ka Assam leh ko yeini emkaam wow pyntip wut-wut cha ka Council.
