U Bhaichung Bhutia uwa jooh man kam uwa yalehbol wa pawnaam ka India uwa da psiah cha ki kaam seiñ hima sima, ha kani ka kynti leh ym pu dur u yoh u yei jop heiwa dang chah pyntam u ha u Rikshal Dorjee Bhutia uwa man kam u kyrtong ka Sikkim Krantikari Morcha (SKM) uwa da tam da 4346 Vote na Barfung Constituency wei ka niaw Vote kattæ da jan kut ko neibynta ka Election MLA ka Sikkim.
U Bhaichung uwa da yaleh na ka Sikkim Democratic Front (SDF) Party, ym yoo em laad de ya ka neidaw wa ka Sikkim Krantikari Morcha (SKM) da kreh ko wow jop 31 tylli na ki 32 tylli ki Constituency katwa ka SDF da jop ko du ha kawi donhi.
Kam wow pynkynmoo wa u Bhaichung da sdang u da ka yong oo hi ka Party kawa tip kam ka Hamro Sikkim Party ha u snem 2018 tangwa da pynpsiah noh u ka chapoh ka SDF ynnin u snem wei da man u leh kam u Vice President ka SDF kawa man leh kam ka liang pyrchah hapoh ka jylla Sikkim.
U Bhaichung da dep yaleh Election u na West Bengal la ar sien kam u kyrtong ka Trinamool ha ka Lok Sabha Election 2014 na Darjeeling neitæ ka Election MLA na Siliguri heiwa da rem u waroh ar sien.
Hadien ini da lai psiah u cha ki kaam Politics ka Sikkim heiwa da sdang u da ka yong oo hi ka Party wei da yaleh Election MLA u na Gangtok wa Tumen-Lingi heiwa da rem u ha waroh ar thaw ha u snem 2019 deiwa yoh 70 Vote wa 234 Vote neitæ da rem u leh ha ka Bye Election wa da pynman ha Gangtok ha u snem 2019 hi deiwa yoh 579 Vote heiwa da dooh u leh ya ki Deposit u ha waroh le sien.
Lada rem u sa ha kani ka kynti da mut wa da dep rem u la 6 sien ha ki 10 snem nadooh wa sdang u yaleh Election.
Discussion about this post