U MLA ka BJP ha Maharashtra, u Parag Shah, toh uwa mahajon dooh na waroh ki MLA ha ka jylla wei ha ki sngi wa dadep da ieh u chadien ya ki pulit wa yada ya oo kamjooh ki kari u wow pynlait por ha sarok ka Ghatkopar, Mumbai wei ya ini da leh u wow yoo kammon im ki bru paidbah man-ka-sngi.
U Parag toh u MLA na Ghatkopar East heiwa da riam u kam uwa khrong wei i Video na ini da poor bha i ha Social Media.
Ya ini da leh u katkam i e buit u heh niam Jain, u Guru Namramuni wei da uiñ u ha sarok ka Ghatkopar wow paan yarap khlem em wa tipmit oo.
Da ong u wa da ini i pyndur yong oo da yoo u kammon man ki bru hawa yoo ki ya oo kam u uwa khian i kyrdan.
“Waroh ki bru wa em i burom ya nga, kiwa yang wow yachem wa nga tangwa ki jooh hi ki bru da rap sarong ki manda yoo ya nga kam uwa khrong,” da ong u Parag deiwa ong leh wa ini pynyoo i yeiwa sakhiat iwa jia ha pyrthai.
Da yaroh u leh ya kiwa sbun ya oo ha sarok ka Mumbai heiwa uwi u bru da e u ya oo Rs. 20 manda paan baam u, heiwa uwa dai samosa da e baam u ya oo khlem chim poisa.
U Parag da chong u leh harood sarok wow baam kam uwa khrong.
Hadien wa sait u yei Makeup, u Parag da liwan biang u cha i jooh i thaw wow yaklam wa ki bru wa chem u kam uwa khrong heiwa da khyrngiat u wow yoo kammon man ki bru manda yoo ki oo hadien wa riam u kamwa jooh kam u MLA.
U Parag ha ka Affidavit neibynta ka 2024 Maharashtra Assembly Election da pynbna u toh uwa chongdor Rs. 3,383 klur, iwa pynman ya oo kam u kyrtong wa mahajon dooh ha Maharashtra. Man u leh u Businessman wa u Real-Estate Developer.
Discussion about this post