I khlieh tnoom ka yung dorbar chna aiñ namo ka Meghalaya Assembly Building kawa dang chna thymme ha Mawdiangdiang hapoh ka New Shillong Township (NST) da haap hi khroom chapoh wei ini man i leh i bynta wa da chimpor wow pynyieñ wei wow tymmoh leh.
Ha u Naitung (Apr) uni u snem, neiliang u Speaker ka Meghalaya Assembly, u Metbah Lyngdoh da lai pait u yei pynchna ya kani ka yung dorbar heiwa da yooluti u wa ha uni u Naikhynde daw ye u wai syndon ya kani ka yung.
Da khana u ha utai u bnai wa i kreh wa emkaam wow pyndep toh ya ka tnoom (Dome) wei kamwa 75% toh iwa da pyndep wei daw pynyieñ leh ya u Minar uwa man kam u chrot wow em ha khlieh dooh kani ka tnoom.
Ini i haap kani ka tnoom toh iwa da jia ynne i step synyaw wei da sñiaw nyngkong ya ini da ki bru wa sah chajan katai ka thaw neidaw wa ood bha ini i haap ki moo ki naar.
Ini i haap toh iwa joor bha wei ym pu tip lada em i jia wa sñiawsih lane i mynsoo ki bru, tangwa neiliang ki bor wa toh u pait yeini wa ki pulit dang takit ki lada em iwon iwon.
Ya kani ka yung dorbar da chna hei mang poisa wa T. 145 klur, tangwa ka Rajkiya Nirman Nigam Ltd. kawa man ka Company kawa yoh u pynkreh da chim ko yei kaam hei lut wa T.127 klur ha ka thaw wa heh kamwa 80 Acre, wei da booh por hapoh a 30 bnai nadooh wa da sdang wow pynkreh ha u Naiynru yong u snem 2019.
Puræ leh: Ha u Naikhynde booh thong ka sorkar wow wai ya ka Meghalaya Legislative Assembly Building
