Ka Hill Farmer’s Union (HFU) West Jaiñtia Hills District Unit da khut da wer ko ya waroh ki warep cha ka lehkmen ya ka 31st Foundation Day namo ka sngi wa seiñ ya ka Hill Farmer’s Union kawa daw pynman ha ka 13 tarik uni u Naisan ha Ummulong Community Hall (Madan Khawang) ha ka chnong Ummulong, West Jaintia Hills District.
Ha kani ka sngi, ka seiñ daw kynmoo burom ko yei sdang ya kani ka seiñbah ki warep wei daw wan u sakhi lang da kiwa yahkhmat ki warep na ki Unit yong ka seiñ na waroh kawi ka jylla wei kamjooh leh na ki Unit kiwa em cha baar ka jylla.
Ya ka yalang u sdang heipor 10:00 waje i step wei daw em leh i wai pyrda wei daw bood sa ka ya phyllu yumut hapyrdi ki warep wa ki sahep sorkar na ki chnat waphær waphær kiwa yatoh wa ka rep ka riang kamjooh ki kaam ri wei psan mrad.
Neiliang u President ka HFU West Jaiñtia Hills District, u Mutshwa Thabah da kyrpaad u ya waroh ki warep wow pynlait por khang wow wan cha kani ka yachemlang ki warep wei leh wow pysñiaw yei eh i khoo wa kam ki warep da maad ki khnang wow yoh ki yei jop na ini i eh deiwa yatylli wei deiwa ya krehlang.
