Ka Khasi Students’ Union (KSU) Huroi Unit hapoh i yahkhmat u President, u Wallam Lamin Gadew wa u Vice-President, u Gilbertstar Khonglah da yoh ki wow yachem markhmat ya ka MLA ka Sutnga-Saipung Constituency, ka Santa Mary Shylla ynnin ka sngi hawa wan ko wow pait yei kreh sarok Sonapur-Borghat wa ka Border Haat ha Huroi.
Ka seiñ da pynsñiaw ko yei eh ki paidbah wa chong chnong yong ka thaaiñ khappood nadooh ka chnong Lejri, Lahaleiñ wa ka chnong Huroi heiyatoh wa i ktieh wa cha palat u sarok wei wow dawa kyrriah noh syndon ya ki Border Security Force (BSF) kiwa da chong ha ka yingkieñ Sonapyrdi wei kiwa jooh pyndik man-i-por ya ki paidbah wa sah ha khappood.
Neiliang yong ka Santa Mary Shylla da kular ko hakhmat yong ka seiñ wow chimkhia hajrong ini i kaam deiwa pynsñiaw cha ka sorkar jylla wa cha ki bor wa toh u pait yong ka Home Ministry ka sorkar India ya ini wan booh thaw chong ki BSF ha Sonapyrdi wei wow ya krehlang wa i dawa ka seiñ.
Ini dawa kyrriah ya ka ktem ki BSF wa em ha Sonapyrdi ymtoh de iwa dang thymme tangwa iwa da dawa na i por cha i por beibhah katai ka thaw ym man de ko iwa chngaaiñ ya ki paidbah ha i lai i wan neidaw wa leh embor wei leh bru khloo kini ki chipai cha wa palat.
Kamtæ neiliang yong ka seiñ da kyrpaad joor wei da dawa joor ko na ka sorkar jylla wa na ka MLA wow leh smat yeini i kaam kat wym pu jia iwon iwon iwa daw sihlet ha katai ka thaw. Ka seiñ da maham ko leh ya kitai ki chipai wa toh u mih noh ki na katai ka thaw wei lada ym ap ki yeini, ye wow poi cha u pood pynyoo bor.
