Ka MCSWA kawi na ki seiñ kreh mon sñiawbha wa da slem bha i chakri ya ka Ri-loom Jaiñtia waroh kawi. Ha kani ka 6 tarik chirup i ya krehlang waka yung krehkaam ka District Social Welfare Officer ka West Jaiñtia Hill District da pynman ko ya ka Sensitisation Cum Advocacy Meeting ya ki dkhot yong ka Synjuk ki Waheh Chnong Jowai.
Ya kani ka yalang da pynman ha Chiliangraij Community Hall chirup i emlang ka J. Synnah, DSWO WJH, ka Dr. JN Shullai, Director MCSWA, u AJ Nongkynrih, Chief Functionary MCSWA, ki dkhot ka Synjuk ki Waheh Chnong wa ki wakreh ka MCSWA.
Neiliang u AJ Nongkynrih hawa e ya ki kyntien pdiang da pynche haroh u yei thmu wa khut pynman ya kani ka yalang deiwa ong u wa kat nang mih ki sngi ki khynnah wa ngop haki kaam sih wa har rukom mih ki, kamtæ kam ka seiñ wa kreh heiyatoh wa ini i kaam, ym ye ko u kreh samen, kamtæ emkaam yei ya krehlang i ya kyrchaanlang nadooh kiwa yahkhmat chnong, kiwa chong chnong khnang yow ye u wanrah i kylla ha ka imlang sahlang. Da booh u leh yei kyrpaad hakhmat kiwa yahkhmat chnong yow e ki ka kti timun tidiang khnang wa i thmu yong ka seiñ u man i iwa jop.
U Riquoma RQ Laloo, Secretary Synjuk ki Waheh Chnong hawa e yei klam da yaroh u ya ka seiñ wa da ye ko u lai luti hadooh 40 tylli ki snem, wei neiliang yong oo da e bor e mynsien chooh chooh u ya ka seiñ yow nang ku ko ha waroh ki liang neibynta i myntoi ka imlang sahlang.
Ka. Dr. JN Shullai kawa man leh kam kawa seiñ ya ka MCSWA, da batai ko yei daw wa pynman ya ka wa u kurim ko wow sdang ya kani ka seiñ, wei da ong ko leh wa ha ki 40 tylli ki snem wa lai luti ki, da chem ki chiboon i eh tangwa ka yukit yong ki toh wow e chakri yeiwa emkaam iwa da pynman ya ki u pteiñ yei kreh hadooh katni. Da batai ko ya chiboon ki Project wa da leh da ka MCSWA khamtam heiyatoh wa ki bru kiwa im hei uiñ i lai wiarnar khamtam ya kitu kiwa em ya u khñiang kjut HIV.
Hawa kyruiñ won cha ki jait dih pynmuaid da chem wa kat nangmih ki sngi, ki khynnah wa pynemkaam Drugs nang joor ki, kamtæ da ban ko yei emkaam u em noh ya ka De-Addiction Center lane ka Rehabilitation Center.
Da khut haroh ko yei krehlang yong waroh ki chnong ki thaw khnang yow ye u pyndooh pyndam ya kini ki sih wa boon jait.
Neiliang won ka J. Synnah hawa e yei klam da yaroh ko ya ka MCSWA neibynta i yoo jngai yong ka wei da yaleh ko wow thooh chiboon ki jait Project waphær waphær khnang yow ye u wanrah biang ya ki khynnah wa khlem kaam khlem jaam yow yieñ ki hei kjat yong ki hi.
Da chim haroh ko yei bynta u batai ya ki Scheme waphær waphær wa ka yung krehkaam yong ka e yarap ko neipor cheipor. Da khut haroh ko ya waroh ki seiñ wa da dep tipmit (Register) wow li mih ki cha yung krehkaam yong ka khnang yow yoh ki yei tip wa rap bniah.
Ha kani ka sngi da yoh haroh i batai bniah ya ki Project waphær waphær wa kani ka NGO leh ko kam ka Targeted Intervention Project, ka Home Health AIDE, Skill Training wa kiwi kiwi de na ka Iooika Bareh, PM MCSWA FSW wa na ka Sunita Suna.
Ya ka yalang ha kani ka sngi da pynlai da ka Rinibeth Patlong, PM MCSWA.
