Hadien wa sahteiñ da ki bnai wow pynbait wow pynkrehkaam ya ka hukum ka sorkar jylla heiyatoh wa i dor thymme yong i bai kit mar ki truck, neiliang ka sorkar jylla lyngba u Secretary ka chnat Transport ka jylla, da khut yalang wow yaklam pynbait noh hajrong ini.
Ya kani ka yalang da khut wow pynman mynstep ka 4 tarik heipor 4:00 waje i janmiet ha Conference Hall ka Main Secretariat Building, Shillong.
Kani ka yalang toh kawa da khut hapyrdi ka Joint Action Committee (JAC) kawa kynthup ya ka All Jaiñtia Cement And Clinker Transporters Association (AJCCTA), ka Jaiñtia Hills Truck Owners Association (JHTOA) wa ka Meghalaya Truckers Union (MTU) wa ka seiñ ki karkhana pynmih khyndaw–bilat na Ri-loom Jaiñtia namo ka Jaiñtia Hills Cement Manufacturers Association (JHCMA).
Kam wow pynkynmoo heini ka JAC da dawa ko wow pynkrehkaam ya i dor bai kit mar thymme katkam ka hukum wa da pynmih da ka sorkar jylla ha ka 13 Duyatra uni u snem.
Chooh chooh ha ka yalang wa khaddooh wa da pynman hapyrdi u montri rangbah ka jylla, u montri ka chnat Transport wa ki heh ka chnat Transport chirrup kiwa mihkhmat kini ki ar liang, neiliang ka sorkar da ekti ko ha kini ki ar liang wei wow pyntip ya i rai yong ki cha ka sorkar hapoh chi tayaw.
Neiliang u Nidamon Chullet uwa man kam u President ka JHTOA, da kyrmen skem u wa mynstep daw ye wow yapynbait pynkut noh ya kani ka kaam.