Jowai: Ka Dorbar Chnong Panaliar da pynche ko yeiwa jia haka miet ka 19 tarik uni u bnai heiwa da em 5 ngut ki khynnah da yoh kem ya ki da ka Chutwakhu Social Welfare Local Dorbar kiwa rooid wa taar ya ki kari wa pynyeiñ cha rood sarok ha Chutwakhu.
Ka Panaliar da pyntip ko wa haka miet ka 25 tarik uni u bnai da phah ko ya kini ki 5 ngut wow wan mih hakhmat ka Executive Committee ka chnong Panaliar, heipor 7:45 i miet.
Da kylli takit bha ya ki da ki dkhot heiwa da chem kamni ha wah:
- Ki soo ngut na kini ym toh kiwa ki khon ka chnong Panaliar.
- Lai uiñke ki cha Chutwakhu, wei da rooid taar ki ya ki 3 tylli ki kari.
- Kini ki khynnah da khana ki wa ym jooh em u leh ki kam kini ki kaam nachwa wei da paan maap ki na ka chnong Panaliar waroh kawi yeiwa da pynmih ki yei pyrtuid ka chnong, wei da kular ki wa ladang chem yeileh pynsih yong ki heiwon iwon i thaw, ka chnong ye ko ki u pynchitom ki.
Ka Executive Committee ka chnong Panaliar da sneiñ ko ya ki weiwa da maap yeini chisien deiwa maham ya kiwon kiwon kiwa pynmih yei pyrtuid ka chnong kiwa ym toh ki khon ka chnong deiwa pynsih pyrtuid ya ka chnong. Ka chnong Panaliar ye ko u pynchitom deiwa eh ya ki heijooh i por u e kti cha ka aiñ pulit.
Ka chnong hi waroh kawi sñiawsih ko deiwa pynrem joor yeini i leh kini ki khynnah.
Ini toh katkam wa pyntip u Requoma Rq. Laloo, waheh chnong ka Panaliar.
Discussion about this post