April 26, 2019
0 Comments
Jowai: Ka Inter School Athletic Meet wa le sngi lynter wa pynlai da ka yung krehkaam u District Sport Officer wa ka West Jaiñtia District Sport Association da poi ko chawa kut ynne ka sngi ha madan Kiang Nangbah Stadium Jowai, heiwa ka R.S. Manner, ADC ka West Jaiñtia da man ko kam ka kongsan.
Ka R.S. Manner hawa klam e mynsien ya ki khynnah skur da ong ko wa ymphær lada jop næ rem, tangwa waroh man hi ki kitæ kiwa jop neibhah wada yoh ya kam kani ka laad wow chimbynta.
Heiyatoh wa kitu ki khynnah kiwa yoh u rah deilang ki khusnaam manda liwan ki, e ko i kyntien pyneh bok pyneh nasib wow jop ki ha ki kaam Sport wei kamjooh leh hei rta pyrthai yong ki, neibhah wa ki man ki ka mynried yong ka ri wei waroh khmied ki cha ki.
Katwa ya kitu won ki wym poi thong ha uni u snem da kyntu ko wym toh u dooh mynsien ki tangwa dang em boon ki laad ha kawi won ka por.
Kamtæ na pyrdi ki 22 tylli ki skur wa wan chim bynta, yei naam Best Athlete ha ka kyrdan Under-14 Boys da yoh da u Anrison Rapthap na ka North Liberty Higher Secondary School Jowai, haka Under-14 Girls won da yoh da ka Liza Chyrmang na H.K. Singh Memorial Secondary School Jowai, ha ka Under-16 Boys da yoh da u Miyoolangki Rymbai na ka H.K. Singh Memorial Secondary School Jowai, ha ka Under-16 Girls da yoh da ka Durka Nangtiang na Seiñraij Secondary School Jowai, ha ka Under-18 Boys da yoh da u Lamborki Lyngdoh na Govt. Boys Higher Secondary School Jowai, ha ka Under-18 Girls won da yoh da ka Ioshida Kyndait na North Liberty Higher Secondary School Jowai.
Yei naam Best Team ha ka kyrdan Under-14 Boys da yoh ka North Liberty Higher Secondary School Jowai, ha ka Under-14 Girls da rah ka H.K. Singh Memorial Secondary School Jowai, ha ka Under-16 Boys da rah ka Govt. Boys Higher Secondary School Jowai, ha ka Under-16 Girls da rah ka North Liberty Higher Secondary School Jowai, ha ka Under-18 Boys da rah ka Govt. Boys Higher Secondary School Jowai katwa ha ka Under-18 Girls won da yoh ka North Liberty Higher Secondary School Jowai.
Advertisement
