Ka Jaintia Coal Owners, Miners, Suppliers & Workers Association (JCOMSWA) ynne da pynman ko ya ka lai paidbah (Rally) cha ka yung krehkaam u DC ha Khliehriat heiwa ki paidbah wa wan chimbynta da chong ki ha pyrdi sarok neidaw wym yoh u psiah chapoh pchem.
Hadien ini da khut ya kiwa yahkhmat ka JCOMSWA wow yaklam wa u DC heiwa da pynsñiaw ki ha oo ya ki dawa yong ki heiwa u DC da ong u wa ymtoh iwa em hei bor yong oo.
Kamtæ hadien ini da phah chithi cha ka seiñ yow pyntip wa u Chief Secretary ka jylla da mynjur u wow yachem wa ki dkhot ka JCOMSWA ha ka 17 tarik uni u bnai heipor 2:30 i sngi ha kamra krehkaam u ha Main Secretariat Building, Shillong.
Neiliang won u MLA ka Khliehriat uwa man u Chairman ka chnat Mining, u Kyrmen Shylla da pyntip u wa kam uwa mihkhmat ka thaaiñ ryngkat wa ka MLA na Sutnga Saipung, ka Santa Mary Shylla da yachem ki wa u Montri Rangbah, u Conrad K Sangma wow pynsñiaw yei dawa yong ka JCOMSWA wei neiliang u Montri Rangbah da booh por u wow yachem wa ka Association ha ka 22 tarik uni u bnai.
Discussion about this post