Ka seiñ Jaiñtia Hills Truck Owners Association (JHTOA) lyngba u President yong ka, u Nidamon Chullet da pyntip ko wa ka seiñ daw pynman ko ya ka yalang bah ha ka 1 Kmaichonglad (December) 2021 ha Tuber Takhniang ha yung krehkaam ka seiñ heipor 11:00 waje i step.
Ha kani ka yalang daw yaklam hajrong ki mat dawa wa sahteiñ yong ka seiñ khamtam heiyatoh wa i wym mano ki karkhana pynmih khyndaw-bilat wow su ya i dor wa da booh ka sorkar.
Neiliang u Nidamon Chullet da ong u wa ki karkhana khyndaw-bilat da chukor ki ya ki tre truck neibhah wa katkam i yaklam wa ki heh karkhana ha Shillong da pdiang ki wow su katkam i dor wa da booh ka sorkar tangwa da kut i du hei klam donhi khlem kreh i kaam iwa pynyoo wa ki karkhana ym burom de ki wot ya ka sorkar leh.
Kamtæ hajrong ini da kyntu u ya waroh ki tre truck kiwa em ha Ri-loom Jaiñtia wa kiwa na ka jylla wow mih paidbah ki ha kani ka sngi wow wan cha kani ka yalang wow chim ya ki rai wa khor heiyatoh wa ki mat dawa ka seiñ.
