theme-sticky-logo-alt
theme-logo-alt
Advertisement ad1

Dawa hiar huki ka HITO ya ki wym toh ki jaitbru ri-loom wa ksoh kaam ha ki Sports Association

Ka seiñ Hynñiewtrep Integrated Territorial Organization (HITO) da thoh ko cha u Montri ka chnat Sports & Youth Affairs, u Banteidor Lyngdoh uwa man leh kam u President warim ka Meghalaya State Olympic Association (MSOA) yow pynsñiaw yei pyrchah yei mihkhmat wei ksoh kaam da ki baar jylla ha ki Sports Association wa ha ka MSOA iwa da pyndooh mynsien ya ki jaitbru Ynñiawtrep wa A’chik hapoh ka jylla.

Ka seiñ da pynsñiaw ko leh yei kyrchaan ya ka KSU wow e laad ya ki jaitbru ri-loom ka jylla wow mihkhmat ha ki yalehke hapoh ka jylla kamjooh cha baar ka jylla.

Ka HITO da e nongmuna ko wa uwi na ki dkhot yong ka wa 10 ngut ki dkhot ka Meghalaya Powerlifting & Fitness Association da lai chimbynta ki ha ka National Bench Press Championship 2021 ha Goa nadooh ka 15 haddooh ka 20 tarik uni u bna heiwa da yoh takma rupa wa takma tama kiwa napoh ka jylla tangwa katni ka yalehke toh ka wym em tipmit kam ka yalehke Olympics hapoh ka ri wei ya kam kini ki jait leh toh u e kyrchaan poisa.

Da kyntu leh ya kiwa mihkhmat paidbah, ki sahep sorkar kiwa ksohkaam leh kam ki ki President/Secretary wow ieh ya kini ki kaam lada ym yoh por ki wow pynku ya ki kaam yalehke khlem da ye wow pynmih ya ki khloor yalehke heiwa ka sorkar da pynbna ko wow pynmih ya ki Champion ha u 2024 lane 2028.

Da kdaw leh wa em ki sahep sorkar wa ki Coach kiwa ksoh kaam hapoh kiwa boon ki Association kam ka Archery, Athletics, Boxing, Badminton, Shooting, Table Tennis, Football, Karate, Wushu wei ini daw pyntyngkhooh yei kaamram sorkar wei ki Coach lada man ki kam ki wakreh sorkar daw yachah chilliang ki hawa jied ya kiwa yalehke.

Da ong leh da em ki kattu katni ki wym toh ki jaitbru ri-loom kam u Chiranjib Choudhary, Secretary Table Tennis, D. Mallick ha ka Judo, Manoj Singh, Secretary ka Taekwondo, Dilip Gurung, Secretary Volleyball Association kiwa da ksoh yei kaam da slem khlem da ye wow pynmih ya kiwon kiwon ki khloor yaleh wa yoh takma lane i yoh u rah ya ki Championship.

Da pynsñiaw leh yei phylla wei i wym sñiawthooh wa kammon ka MSOA da e laad ki wow man General Secretary da u wym toh u jaitbru ri-loom yow mihkhmat ya ka Meghalaya ha ka Indian Olympic Association katwa kiwi ki jylla kam ka Mizoram, Nagaland, Manipur da phah du ki jaitbru yong ka jylla donhi. Deiwa pynrap wa ym em pyrchah ki ya kiwi ki jaitbru neibhah ki da em ki ka yong ki hi ki jylla wow mihkhmat kamtæ ka Meghalaya leh emkaam ko da ki jaitbru yong ka hi.

Kamtæ da kyntu ya u Montri wow phah hiar chuki noh ya ki wym toh ki jaitbru ri-loom kiwa ksoh kaam ha ki seiñ yalehke wei lada ym leh yeini daw pynman noh da ki yakhih paidbah.

Advertisement ad1
Share this:
Previous

Sa 149 sngi ym yoh nongsngi ki Home Guard Volunteer wa kreh heipor ka khlam

Next

Khut yalang bah ka JHTOA wym bien ki karkhana wow su yei dor wa da booh