Ynne ka sngi u Montri sorkar uwa man leh u MLA ka Jowai, u Wailadmiki Shylla da ong u wa da booh ya 18 tylli ki mooyurim neibynta ki kreh thymme wei booh leh ya ki 7 tylli ki mooyurim yong ki kreh kiwa dadep deiwa pynrap wa em na kini ki kreh toh kiwa da sdang i kreh wei em leh kiwa daw sdang yei kreh.
Da kdaw u wa kini ki kreh kynthup ki ya ki sarok, ki thaw sumaar kam ki Sub Centre ha Sabahmuswang, ha Ialong weiwa kini ki kreh kiwa man kam ki thied snaam toh kiwa da mang kyrpang neibynta ki paidbah ka Jowai Constituency heiwa da booh ya ki 25 tylli ki mooyurim ynne ka sngi deiwa kdaw leh ya ki sarok kam uwa ha Niriang, Ialong, Salaroh-Mihmyntdu, ki yung skur, ka Stadium wa kiwi.
U Wailad da ong u wa kini ki 25 tylli ki mooyurim toh ki jubab yeiwa kylli ki bru weileh wym rap Phone u, wa wiar u, heiwa kini dang man ki kaam kiwa khian hawa nujor ya ka Iawmusiang Shopping Complex, ka Mini Secretariat wa kiwi kiwi.
Hawa yaroh ya ka sorkar, u Wailad da ong u wa lyngba kani ka sorkar da yoh ya ka Government Medical College, Engineering College, ka State University, ka College of Architecture wa kiwi kiwi. Sa kawi ka Government College ha Jalaphet yow stiñ ka Kiang Nangbah Government College deiwa pynrap wa dang em chooh chiboon i wow yoh i wei daw yoh chooh chiboon ha ki por wow wan hapoh i yahkhmat u Conrad Sangma kam u CM katkam i angnood ki paidbah ka Jowai Constituency.
Heiyatoh wa ka Tourism Convention Centre ya kawa dang chna ha Thadlaskeiñ da ong u wa nachwa hawa wan kiwa uiñke sah ki ha Shillong wow lai cha Shnongpdeng, Krangsuri wa Garampani heiwa kattu ha kani ka thaw ye ki bru wow sah wei u yoh khih yoh kreh kiwa boon nadooh kiwa kamai kari, kiwa rep wa kiwi wei katni da emkaam u pynmiat ya ka nan Thadlaskeiñ.
Da ong u wa ka PMAY toh ka Scheme chna yung ya kiwa duna hei yoh i laa heiwa wot ha sor Jowai leh dang chitom u yoh myntoi na ka Sceheme neibhah ki yung ym em thaw ki kamtæ da kyrpaad u wow wanrah ya ki Affordable Housing Complex neibynta kiwa duna hei yoh i laa ya kiwa im ha sor.
Heiyatoh wa ka Iawmusiang da ong u wa daw yaklam wa u CM wow pyndap ya ki dukan wa duna neibhah hawa tympra ya ka em kamwa 600 tylli ki dukan heiwa katni nei chna pynmiat wei pynwandur ya ka da duna noh ki dukan ha ka.
Da ong u wa emkaam leh ya ka Hostel ki khynnah kynthai kiwa wan na ki manyung wa duna hei yoh i laa wei da kyrpaad ya kani na u u CM wow yoh yarap u chna ya ka.
Da e khublei kyrpang ya u Conrad Sangma deiwa kyrpaad wow e ya ka Additional Buidling ha KNGC, ka Mini Secretariat heiwa da pynwandur (Plan) wow em ko le Wing wei dadep ya kawi heiwa da kyrpaad wow pynlait poisa noh wow chna ya kiwa dang sah.
Discussion about this post