Khliehriat: U Deputy Commissioner, East Jaiñtia Hills District da pynbna paidbah u wa da pynkrehkaam ya ki aiñ wa kynthup ya ka Disaster Management Act, 2005, ka Indian Penal Code, ka Epidemic Disease Act, 1897 wa ka Essential Commodities Act, 1995 hapoh ka District.
Da ini i pynbna paidbah da leh khnang wow pyntip wei wow pynche paidbah hajrong i pynchitom heiyatoh wa kini ki aiñ.
Katkam ka Section 51 (b) yong ka Disaster Management Act, 2005, i pynchitom toh neibynta kiwa ym ngait næ bood ya ki maham ka sorkar wei ye u chah kset hadooh chi snem wa ka kuna wei ye leh u chah kset hadooh ar snem.
Ha ka Section 52 i pynchitom toh neibynta ki kaam wa thok donhi, wei ye ki u chah kset patok hadooh ar snem ryngkat wa ka kuna.
Neibynta kiwa pynemkaam bakla ya ka poisa næ ya ki mar wa emkaam, u chah pynngat ki ha ka Section 53 wei i pynchitom toh wow kset patok hadooh ar snem ryngkat wa ka kuna. Katwa, ka Section 54 yong kani ka aiñ u pynchitom ko ya kiwa pynbna bakla wei kiwa ngat ha kani ka kyndon ye ki u chah kset patok hadooh chisnem namo ka kuna.
Heiyatoh wa ka Section 188 ka Indian Penal Code i pynchitom katkam kani ka aiñ ka toh neibynta i wym ngait næ bood ya ki hukum ka sorkar, wei kiwa pyrchah ye ki u chah kset patok chibnai namo wa ka kuna namo 6 bnai namo ka kuna namo waroh ar.
Kamjooh leh ka Section 3 yong ka Epidemic Disease Act, 1897 da pynche wa kiwon kiwon kiwa leh pyrchah u chah pynchitom ki katkam ka Section 188 ka Indian Penal Code.
Chooh chooh da pynkrehkaam leh ya ka Essential Commodities Act, 1995 heiwa ka Section 7 kani ka aiñ u pynchitom ko ya kiwa leh pyrchah ya ka Section 3, wei kiwa leh pyrchah daw chah kset patok ki hadooh chi snem ryngkat wa ka kuna wei ye u chah kset ym duna ya ka 3 bnai wei ye u kynjoh chadooh 7 snem ryngkat wa ka kuna. Lada tyngkheiñ ar sien yei jooh, ye u chah kset patok ym duna ya ka 6 bnai wei ye u pteiñ chadooh 7 snem ryngkat wa ka kuna.
Discussion about this post