“Nga samen beiñ joor O yeiwa klam u CEM ka Karbi Anglong Autonomous Council (KAAC), u T. Ronghang wow kam wa kiwa chong chnong ka Mukroh toh kiwa wan chong tooh pyrchah aiñ,” da ong u CEM ka JHADC, u Thombor Shiwat ynne ka sngi hawa yaklam wa kiwa pathai khubor hawa lai hiar u deilang waka EC cha Mukroh deiwa pynrap leh wa kani ka chnong em ko ki waheh chnong neipor nynde.
Kam wow pynkynmoo heini, hadien wa jia i chah siat ki 5 ngut kiwa chong chnong ka Mukroh ha ka 22 tarik u Khonchonglad, neiliang u CEM ka KAAC da kam u wa ka chnong Mukroh haap ko hapoh ka Karbi Anglong Autonomous Council wei kiwa chong chnong ka Mukroh toh kiwa wan sah tooh donhi ha kani ka chnong.
Chooh chooh u Thombor da ong u wa ka chnong nadooh ki snem 1968 da em ko jar u pood u ang wei jiar ka Map wa kamjooh ki waheh chnong.
Heijooh i por da ong u wa ka Assam sæ kawa da psiah tooh pyrchah aiñ chapoh u pood ka chnong neibhah da yoo ya u pood ka chnong neiwon sdang u wei ki Assam sæ kiwa da wan psiah tooh wow chna Outpost chapoh u pood ka chnong Mukroh.
