Ka seiñ, the The Association of Meghalaya Traders and Transporters (TAMTT) ynne da e dorkhat ko ha u Deputy Commissioner ka East Jaiñtia Hills wow pynsñiaw yei pyrchah ya ka yei pynemkaam ya ki Heavy Bulker Truck da ki dkhot ka Jaiñtia Cement Manufacturers Association wow kit clinker, khyndaw-bilat wa fly ash na East Jaiñtia cha kiwi ki thaw ka jylla wa ka ri.
Ka seiñ da ong ko wa ki Bulker Truck toh kiwa khia palat bar yeiwa da chah u kit ha ki sarok wa em ha ki thaw loom ka jylla deiwa kdaw wa kini ki truck toh wa da khang wow lai ha ki sarok khian, wa man single-lane, kiwa dong bha.
Da kdaw ko wa ki sarok ha East Jaiñtia Hills, khamtam u NH-6 hapyrdi ka Khliehriat, Malidor wa Jowai toh u single-lane wei kiwa dong kam ki klip sñiooh wei kini ki truck man ki pyrchah ya ki hukum ka Section 115 ka Motor Vehicles Act, 1988, ka IRC:SP:48 — “Hill Road Manual”.
Ka TAMTT da ong ko wa em 800 ngut ki tre truck wa pynlai kari wa da register hapoh ka District Transport Office, East Jaiñtia Hill kiwa da chah knieh khih ki hadien wa pynkut ki chiboon ha ki kari iwa man pyrchah ya ka Article 19(1)(g) ka Constitution ka ri.
Da kdaw ko leh wa ki bulker truck wanrah ki chiboon i sahkut kari ha u NH-6, khamtam ha Khliehriat, Malidor wa Jowai iwa pynthut yei lai ki ambulance, school bus, wa kiwi ki kaam wa jhan heiwa ini i kah luti man i pyrchah ya ka Section 223 yong ka Bharatiya Nyaya Sanhita, 2023.
Heijooh i por ka seiñ da kdaw ko leh ya kiwi ki kyndon aiñ deiwa kyntu ya u DC wow chimkhia yeini wow yada yei khih i kreh ki tre jylla kamjooh ya ki paidbah wow chngaaiñ wei suk hei lai wei wan.
Discussion about this post