Ynne i janmiet, u General Secretary ka Seiñraij Jowai, u Arwotki Sumer hawa yaklam wa kiwa pathai khubor hajrong ka lehniam Behdeiñkhlam ka Raij Jowai wa tip leh kam ka lehniam Soo Sngi Le Yaaw da ong u daw sdang ko nadooh ka 11 tarik kawa man ka sngi Pynsiñ wei u kut ko ha ka 14 tarik kawa man ka sngi Muchai.
Da khana u wa ha ka Pynsiñ ka 11 tarik ki Kmaiyung wa ki Yungblai u e ki ya ka Chyllap Chilliang wei hadien won ki Khonraij (Chiliangraij) u lai thooh ki ya ka Symbood Khnong wow pynchong ha kjat u Loomsooyung.
Ha i step ka Muchai ka 12 tarik daw pyndep ya ka Kñia Aitnar wei hadien won daw wan ki dong ki chnat ha Mynkoi Pyrdi wow em ka yalang wa tbian chwa wow lai thooh ya ki Dieñkhlam na loom na khloo wow pynpoi hakhmat ka Blai Yaaw Blai Syiem wei hadien won ki Khonraij daw wanrah ki ya ka Khnong Blai wow pynchong ha Loomsooyung.
Ha ka Musiang ka 13 tarik ki dong ki chnat u lai thooh ki ya ki Dieñkhlam na yaaw wow pynpoi cha jar jiar ki chnong ki thaw wei daw em leh i chaad ha talawiar ki thaw niam wa em ha Iawmusiang wa kiwi ki bynta kam ha Madan Datlawakor ha Mynthong.
Ya ki Dieñkhlam daw pynchong chipor ha Madan Siatthong wei daw em leh i e ngooh u Dolloi ya ka Khnong Blai ha Madan Pohsawiar wei neini daw mih won cha Biar Ka Blai wei neitæ u rah ya ki Dieñkhlam jar jiar ki thaw wow pynyieñ ya ki.
Ka sngi khaddooh kawa man ka Muchai 14 tarik dang step ka Loompyrdi Iongpiah u pyndep ko ya ka Kyntiñ Khnong ha Yung Langdoh wei neini hei sngi daw pynhiar ya ki rot ki rong ha Aitnar wei pynbood won sa ka Datlawakor hei janmiet.
Discussion about this post