Ki ar ngut kiwa siat yap ya 15 ngut ki bru heipor wa dang pynman ya ka lehkmen ka sngi wa kyntang ki Jew wa tip kam ka Hanukkah ha Bondi Beach wa em ha Sydney, Australia, da chem toh kiwa chi pa chi khon wei iwa jia kamni toh hadien 30 snem ha Australia kawa em ki aiñ wa khor bha yow thied suloi.
Kini ki ar ngut toh u Sajid Akram (50 snem) wa u khon u uwa tip kam u Naveed Akram (24 snem) wei da suba toh kiwa em tre na Pakistan heiwa hei dur License u Naveen da yoo wa sap u ya ka Uniform ka Cricket Team ka Pakistan.
Ya u Sajid da siat yap ki pulit oo katwa u khon u da mynsoo joor bha u wei dang chah sumaar u.
U Naveed toh uwa da kha ha Australia katwa u Sajid da wan u ha u 1998 da ka Student Visa kawa da pynkylla cha ka Partner Visa ha u snem 2001 wei hadien won cha ka Resident Return Visa.
Heipor wa sdang siat kini ki chi pa chi khon, da em da ki hajar ngut ki bru paidbah ha Bondi Beach wa kynthup leh ya kiwa lehkmen ya ka sngi sdang ka Hanukkah.
Ki Video wa da poor da yoo wa kini ki ar ngut da siat ki naphang kamwa 10 minit haroh wei da em leh iwi i Video wa da poor bha wa da yoo ya uwi u bru uwa wan wow knieh ya ka suloi na kti u Sajid heiwa uni u bru da chah siat won u ha u Naveed.
Uni u bru uwa ye u knieh ya ka suloi toh uwa dai soh ha kani ka Beach uwa da yoh yaroh na ki bru kiwa da ong iwa leh u da ye ko wow yada ya kiwa boon ki bru.
Kiwa yap heini i chah siat toh kiwa nadooh 10 hadooh 87 snem i rta wei kiwa mynsoo da em ki 42 ngut.
Discussion about this post