Jowai : Ka Jaiñtia Students’ Union (JSU) haka 18 tarik uni u bnai hapoh i yahkhmat u President u Rikut N. Parien da lai yachem ko ya u CEM ka JHADC u ma Thombor Shiwat heiwa da e ya oo yaka Dorkhas heiyatoh wa ar tylli ki phang kitæ wow pynmih noh yaki dak thoh hei ktien Pnar wei wow booh noh ya ka yaw dailang næ ka wholesale market.
Ka seiñ hei pyllait khubor ynne ka sngi da kubur ko wa kani toh ka sien wa ar wa ka seiñ da dawa ko naka Council wow pynmih noh yaki ‘Dak thoh’ hei ktien Pnar, kawa nyngkong da e heipor wa man CEM u ma Lamdibok Sumer, neibhah wa sñiaw ko wa ka JHADC man ko kawa em hok wow pynmih yaki Dak thoh wa pura khnang wa ka pateiñ ka jaitbru yow neh yow sah ko.
“Da toh i por wa ka Council u khai thiah ko wow pynneh pynsah yei ktien Pnar deiwa booh ya ka Commiittee kiwa thoh kot ka ri Jaiñtia, ki stat pyrkhat ka thaiñ wa kiwi kiwi lyngba ka Council khnang wow ye u pynmih ya ki dak thoh yow pynneh ya ka ktien kawa em hei ma katni” da ong u President ka JSU.
Chooh chooh u President ka seiñ da ong u wa em i sñiaw sarong wa boon kiwa thoh kot hei ktien Pnar tangwa i rukom thoh phær i na uwi ha uwi weiwa ini mih i neidaw wa ym em ki dak thoh.
Hei yatoh wa ym em ka Yaw Dai Lang hapoh ka Ri-loom Jaiñtia ka seiñ ong ko wa da pyntlot wei da pynhiar dor ko yaka khayi pateiñ ka jaitbru weiwa kani da wai lad wai luti ko ya kiwa na lait kiwa wan chim kabu yeini. Weiwa ini ktah ko ya kiwa rep kiwa ri mrad neibhah ym ye ki u pyllai yaw ya ki mar yong ki katkam wa kwah ki.
Heiyatoh wa kini ki phang neiliang u CEM da kular u wow chimkhia deiwa yaklam ha ka EC weiwow chim ya ki rai kiwa yatoh wa kini ki bynta weiwa neiliang ka seiñ da kular ko wow booddien yeini waroh neibynta i bha i miat ka jaitbru waroh kawi.
Discussion about this post