Jowai: Katkam wa pyntip ki pulit, u Philomath Passah da ujor u wa haka 24 wa 25 tarik u bnai wa da dep, da yoh phone u na uwi u bru wa pyntipmit kam u Sarma deiwa kam wa oo toh u wakreh waka SBI Laitumkhrah Branch wei da phah ya oo da u Branch Manager wow pyntip cha u Passah waka kurim u wow kylliang noh ya ki ATM Card wei wow wan chim ya ki ATM Card wa thymme yong ki naka Bank. Hadien ini uwa ujor da chem u wa hadein wa Update u yaka Bank Passbook, da chem wa em wa sai T. 98,531 naka Account yong oo wa T. 49,985 naka Account ka kurim u lyngba ka Debit Card yong ki.
Ka Temnuyangla Jamir da ujor ko haka 30 tarik u bnai wa da dep wa haka 03-11-17 da phah poisa ko lyngba ka Bank Account yong ka T. 50,000 wa em ha Shillong cha u Yashveer Singh (uwa na India tangwa da man u kam u tre ri Singapore) uwa da kular wow pynuiñ ya kani ka poisa tangwa hadooh katni ym em leh u ya iwa kular u wei da chem leh kawa ujor wa uni u jooh u bru da chimram na kiwi wei da leh u kamjooh.
Haka 21 tarik u bnai wa da dep, u Raghav Bajaj da ujor u wa heipor 6:34 i miet hadien wa pynbait u wa uwi u bru wa ym tpmit u wow thied kari heiwa da su u T. 36,450 lyngba ka Paytm, tangwa hadien da chem u wa da chah thok u.
Haka chi tarik uni u bnai, u Medo Angami na DGAR Nongrimmaw, Laitumkhrah, Shillong da ujor u wa da pynbait u wa uwi u bru lyngba ka OLX uwa tip kam u Jora Singh wow thied ya kawi ka Scooty wa chong dor T. 30,000 kawa da dep su u tangwa ka Scooty ym em poi ko kamtæ da sñiawthooh u wa da chah thok u.
Discussion about this post