Jowai: Ha i miet ka 6 tarik uni u bnai da em ki damok wa tooh ya ka TV wa ka Computer na ka yungsah ka Warden ka Shillong College, Women’s Hostel wa em ha Boyce Road, Shillong.
Ha iwi tawon i jia ha u Divinestar Jamu da ujor u ha ki pulit heiwa da ong u wa ha ka 6 tarik uni u bnai heipor 10:40 i step da yoh phone u na u bru wa kam wa kreh u wa ka SBI uwa da tot chaphang ka ATM Card yong oo wei hadien ini da chem u wa da em wa sai poisa T. 33,733 na ka Bank Account yong oo.
Ha ka 4 taik uni u bnai u Wanshanbor Marwein da ujor u wa ha ka tai ka miet da em wa tooh 4 churia u khoo wa khia 50 Kg kiwa chongdor T. 6,100 na yung u ha Nongkynrih, Laitumkhrah, Shillong.
Ha ka miet ka 2 tarik uni u bnai u Theophilus Lynrah uwa na Nongrah Nongpdeng, Shillong da ujor u wa da em kiwa tooh ya ka Laptop yong oo wei ha ka jooh ka sngi ka Simoul Shadap da ujor ko wa heipor wa lai ko cha i thaw yong ka wa em ha Nongdiengngan (hajan Khadewso Junction) da chem ko wa em wa ah waroh ya ki nar rot yong ka na i yung wa dang chna ko hadooh wa da tympiah ki yei chram wei da rah ki leh ya ki moo block wei da dooh nong ko hadooh T. 80,000.
Ha ka chi tarik uni u bnai ka Maphisha Sutnga da ujor ko wa wiar ka snieh poisa ko wa em ka ATM Card, PAN Card, EPIC wa kiwi de ki kot ki sla ha Jaiaw, Shillong wei hadien ini da yoh SMS ko wa da em wa sai T. 34,000 na ka Bank Account yong ka.
Ha i miet ka 6 tarik uni u bnai ka Ragini Thapa da ujor ko wa heipor wa 6 waje i janmeit da em uwi u bru wa wan wei da knieh u ya ka muna yong ka wa em poisa T. 2,500, chirup wa ka PAN Card, Aadhaar Card wa kiwi kiwi ki kot wa emkaam ha Keating Road, Shillong. Ha ka jooh ka miet uwi u bru wa tip kam u Nur Bahadur Chettri (48 snem) uwa sah ha Iawmusiang Jowai (WJH) da ujor u wa da em ki bru wym tipmit kiwa dung ya oo ha Wah Nangbah, Jowai wei da kit ya oo cha Dr. Norman Tunnel Hospital, Jowai. Ha ka 6 tarik biang heipor pyrdi synyaw da em ki damok wa psiah cha i yung ka Sumanta Mary Talang ha Laitumkhrah, Arbuthnot Road, Shillong wei da tooh ki ya kawi ka Mobile Phone.
Ha ka 5 tarik won u Irshad Khan uwa yah ya ka kari kamai (Tata Sumo) wa em ya u number AS-01DD-3427 da ujor u wa heipor 3:30 i janmiet da em kamwa 5-6 ngut ki khynnah chynrang kiwa da dat ya oo hajan ka Civil Hospital, Shillong wei da tooh ki ya ka snieh poisa u wa em T. 7,000 deilang waka Driving License u.
Ha ka 2 tarik uni u bnai u Fullmoonstar Nongsiej da ujor u wa heipor 12:30 pyrdi sngi da em arngut ki bru ki wym tipmit u da phah li booh ki ya ka kari kamai (Tourist) yong oo wa em ya u number (ML-05Q-2565) wa yah da u Banshanlang Rani na Shillong cha Sohra (EKH) wei manda poi ha Mawkdok (EKH), kini ki arngut da e umsoh ki ya oo wei manda dih u ya ini da yaplær u wei ki arngut da yah ki ya ka kari cha Nagaon, Assam heiwa da noh ki ya uwa yah kari wei da rah ki ya ka kari.
Ha ka chi tarik won ka Lapynhun Sunn wa ka Lily Dona Diengdoh da ujor ki wa ka SBI da pynemkaam ko ya i dur yong ki heipor wa riam ki da ki riam tynre wei da booh ya ini i dur ha ka SBI Advertisement Hoarding wa ha ki Banner ha kiwa boon ki bynta ka sor Shillong la 4 snem khlem yohbor ka SBI na ki.
Discussion about this post