Ka Synjuk ki Nongsynshar Shnong ka Bri u Hynñiewtrep (SNSBH) da dap ko dei sñiawsih wa khroo ryngkat i lyng-a mynsien wow yoo yei long i man yeiwa da chna yong kiwa da kyrchaan poisa daka sorkar jylla wa ka sorkar bei.
Ha ka kyrwoh khubor wa da pynlait da u General Secretary ka Synjuk, u RL Blah da ong u wa ka Synjuk hadien wa da yoo ko lyngba ki laad pathai khubor ya boon tylli ki kreh kiwa ka sorkar da pynkreh kiwa ki bru paidbah da sñiawkmen ki neibynta i myntoi yong ki tangwa katni da kylla dooh burom ya kiwa chong chnong yong ka jylla waroh kawi wei da dai sarom wa da jia ini.
U Blah da ong u wa nadooh i sih ka yingkieñ Dwar Ksuid, i jæd i pai ka ISBT Mawïong, i sih ki bynta u sarok wa hajan ka yingkieñ Mawlai Bypass (ka wym biang tang ki dooid leh) wei katni won da i oor i khlieh tnoom ha ka yung dorbar chna aiñ kawa man ki dak wa chynna wym du ki Contractor ki wym biang tangwa wot hadooh ki Engineer leh kopsar ym em kitkhia ki.
Da kylli leh kammon ya kani ka yung dorbar wa pynkreh da ka Company wa man tre daka sorkar Uttar Pradesh wow jia hadooh katni neidaw wym biang i rukom pynwandur katkam wa pynche da ka PWD. Wei ileh ki kot ki sla ym lai ki na ka miej u sahep uwa pait yeini wei ileh wym pynsñiaw yeini heipor wa biang lada yoo wym biang i rukom pynwandur?
Chooh chooh ka synjuk da pynsñiaw ko yei kylli wa lada ki Montri ka sorkar tip ki namo ym em yei tkoh ha ki chnat sorkar wa toh u pait ya ini i kaam? Wei lada tip ki ileh wym leh ki iyi iyi khnang wa ini i myllien wow leh tangdep wei leh stiñ yei kaam yong ki paidbah u sangeh noh ki chisyndon deiwa khyrwait ya ki sahep sorkar kiwa leh ya ki kaam sop-sop.
