Ki chipai ka BSF Meghalaya ha ka 18 waka 22 tarik uni u bnai da yoh ki wow kem ya kiwa psiah chapoh India na Bangladesh khlem da biang ki kot ki sla.
Ha ka 19 tarik, ki BSF da e kti ki ya uwi u khynnah Bangladesh uwa da psiah bakla chapoh India wei da pynuiñ ya oo cha ki Border Guard Bangladesh (BGB).
Uni u khynnah toh uwa da chah kem na South Garo Hills haka 18 tarik wei da chem ya oo heipor wa uiñ u chwah chaneiñ hapoh u pood ka ri India.
Ha ka 20 tarik won da yoh wow kem ya u Md Sujon Ahmed (20 snem) uwa na Bangladesh uwa da chem wa rieh chapoh khloo wei da kem leh ya uwi hadien wa takit uwa man u nong India uwa tip kam u Md Sukurie (22) uwa na West Bengal uwa da yarap ya uni u nong Bangladesh wow psiah cha India.
Uni u nong Bangladesh da thmu u wow psiah chapoh India khlem ki kot ki sla wa biang lyngba ka East Khasi Hills yow lai cha West Bengal yow kreh deilang wa kiwa da tipmit chwa u ha India.
Ya kini ki arngut da e kti cha ki pulit hadien wa e leh ya ka FIR da ki BSF.
