Ynne ka sngi, ki bru wa chong wa sah haka thaiñ Block-I hapoh ka lama yong ka seiñ Hynniewtrep Border Dispute Redressal Forum (HBDRF) lyngba u Chairman, u Chandame Sungoh, u Convener, u P. Samaiang, u L.Suchiang wa kiwi da lai yachem ki ya u CEM ka JHADC yow pynche wei pyntikna wa ki kam ki Pnar wa sah ha Block-I wymtoh kiwa chong chnong pyrchah aiñ kamwa da pynbaad da u CEM ka Karbi Anlong Autonomous Council, u Tuliram Ronghang, tangwa toh ki Karbi wa wan sah cha Ri-loom Jaiñtia.
Ong ki wa lyngba ki kot ki sla nadooh u snem 1835 A.D. ka thaaiñ Block-I haap ko haka Hima Jaiñtia wei em ko ka yong ka hi ka Elaka wa u Dolloi, wei hadooh u snem 1950 A.D. heipor synchaar ki pharæng leh dang neh ki hapoh ka Jowai Civil Sub-Division. Tangwa nadooh ka 13-04-1951 ka sorkar Assam da pynkhlaad yabor ko deiwa pynyabi yaki chaka United Cachar & Mikir Hills District hapoh ka Karbi Anglong Autonomous Council heithaw wow em ki cha ka United Khasi & Jaiñtia Hills District Council ha itu i por.
“I toh ki tre ri neibhah ye i u pynsakhiat wei lada pait katkam ka History ka Assam wa thoh da u Dr. S.K. Bhuyan ong u wa ki Karbi kiwa wan chong ha Karbi Anglong toh kiwa wan na Tibet wa Burma, nachwa chong sah ki harood ka wah Kalang cha chiliang ka wah Kupli wa hei bynta ka Kaziranga ka National Park ha Assam, kamtæ nei hiar thma u Syiem Kachari chah beh noh ki wei yut ki cha ki loom ka hima Jaiñtia wei chong sah ki hapoh i pait i synchaar u Syiem Jaiñtia,”ong u Chandame Sungoh.
Yow pynsakhiat yei mantre chnong ong u, wot ki pyrtuid chnong ki Karbi kamjooh ki pyrtuid ki loom ki wah leh da khut hei ktien Pnar suda, deiwa e nongmuna kam u Loom Lama, Pdeiñ Lalieh, Pampyrthat, Lumjrong, Chahlyer. Neitæ kam ka wah Mynriang, Myn-i, Umlong, Umpu, Umshara, Umryntih wa kiwi, katwa ki chnong Karbi won kam ka Umkhyrmi, Mookoilum, Tahpat, Mooiong, Umshara, Jrikyndeng wa kiwi.
Heiyatoh waki ktien thylliej leh ong u wa da chim kylliang ki naki Pnar, deiwa e nongmuna kam ka ktien wa ong ki “Nim Rokom” kani wan ko nei ktien Pnar “Niam Rukom”, neitæ ka ktien “Pinchong Pynthih” kani leh wan ko nei ktien Pnar “Pynchong Pynthiah” wei ya u syntu ong ki “Sintu” iwa phær kajiak heh neidaw wym ye bha ki u kynnoh.
Yei ktien Dor, Por, Lakha, Duma, Yaseiñ wa kiwi da klam ki kam ki Pnar hi.
Neitæ kawi naka lehniam wa bna naam yong ki kawa khut ki “Chomangkan” leh da yoh pateiñ ki nei ktien Pnar, “Chomang” mut wa khut siñ ki yaki Pnar kamwa jooh khut siñ ki Pnar yaki Bhoi, “Kan” won mut chaad, kamtæ “Chomangkan” mut ko Chaad Pnar.
Kamtæ hajrong ini i pynsakhiat kyntu ki ya u CEM waka Council hi waroh kawi wow chimkhia ki deiwa khut syndon ya u CEM ka Karbi u paanmaap wei pynche u hajrong i pynbaad yong oo khlem da tip yei sakhiat. Heijooh i por kular u leh wow yania wa u CEM ka Karbi hajrong kani ka kaam.
Ha kani ka sngi neiliang u CEM ka JHADC u Thombor Shiwat, pyntip u wa oo deilang ki Executive Member ka Council leh haka 6 tarik uni u bnai daw hiar lai pait ki cha ka chnong Mukroh.
